Ayaw kahadlok

Ika-12 nga Domingo sa Ordinaryong Panahon
Jer. 20:10-13/ Sal. 69:8-10, 14, 17, 33-35/ Rom. 5:12-15/ Mt. 10:26-33

Daghang mga makuyaw nga panghitabo nga atong nahibaw-an niining mga nanglabay nga adlaw. Nakugang ang pipila nga miuyon ug misupak sa gideklara nga Martial Law. Dili sayon nga moagi kita sa mga checkpoint aron pangitaan ug I.D. Nakidnap sa grupo nga Maute ang pipila ka mga inosente. Nangamatay ang mga sundalo ug mga terorista nga grupo. Nagkagubot sa Resorts World tungod sa nagwala ug nag-wild nga tawo nga hinungdan sa kamatayon sa pipila. Apan luyo niining tanan kita karon gipahimangnuan, ayaw kahadlok.

Niining tuig sa parokya isip kahiusahan sa mga katilingban gihasol kita sama sa nahitabo sa unang pagbasa gikan ni Propeta Jeremias nga ang pinili sulayan gayod sa mga tawong nangita’g kagubot. Apan matud pa sa unang pagbasa, mapakyas ang mga nagbuhat sa kadautan tungod kay ang Dios molaban sa matarung.

Kini mahitabo tungod sa sala nga mitungha sa kalibotan pinaagi sa usa ka tawo. Apan ang tawo mismo diha sa atong Ginoong Hesukristo maoy maghatag kanato sa kaluwasan. Ang grasya sa iyang presensiya magdala ug kadaugan sa kalinaw ug kahapsay.

Diha sa Ebanghelyo, kining maong Kristo maoy atong kalig-on nga bisan gihasol kita sa mga kakuyaw, ang atong pagpuyo sa Kristohanong gipanudlo dili nato talikdan. Wala magpasabot nga kung dunay mga tawong nagsinamok sa atong malinawong pagpuyo nga kita mohimo usab sa ingon isip balus. Wala kini magpasabot nga mohilum na lamang kita sa pagsangyaw sa Pulong sa Dios ug mopadaplin na lang aron dili kita mamiligro. Dili nato ibaylo ang lawasnon lamang nga kaluwasan sa espirituhanong kalingkawasan. Dili nato isukli ang gituhoan nato nga mga mithing Kristohanon sama sa pasaylo, paglaum, kamakanunayon sa Dios tungod lamang sa kahadlok nga kita patyon. Walay makababag kanato sa paglihok alang sa kahiusahan, tungod kay bisan unsa ang mahitabo, ang Ginoo nag-atiman kanato sama nga siya nag-atiman sa mga langgam. Walay mahitabo nga walay tumong. Ang Dios nasayod asa kita niya dad-on. Busa, ayaw kahadlok.