310 partisipante mitambong sa 1st FLA Children Gathering

Niadtong Mayo 20, sa tibuok buntag sa unang higayon nagmalampuson ang gipahigayon nga Archdiocesan Family and Life Apostolate (FLA) Children Gathering didto sa St. Francis Xavier College Seminary, Catalunan Grande. Ang kalihukan subay sa tema: “All baptized are called to Chastity.” Nakadawat og pagtulun-an ang 310 ka mga partisipante nga mga anak nag-edad 13-35, single ug uban sa ilang ginikanan sakop sa FLA/Pangulo sa Kristohanong Banay sa 20 ka mga parokya nga mitambong.

Ang giimbita nga mamumulong nagpaambit sa “Chastity before marriage, A Fresh Prospective” mao si Walter Bautista, usa ka young Professional nga kaniadto aktibo kaayo sa “Youth for Life” sa St. Joseph the Worker Parish, Sasa ug sa Davao Archdiocesan Youth Coordinating Council (DAYCA).

Matud pa sa FLA Director, Rev. Fr. Orlando Angelia, ngadto sa mga youth, “Gusto sa Ginoo nga kamo malipay, kalipay nga malungtad gayod, diha sa kasing-kasing nga masinugtanon sa ginikanan ug sa Ginoo. Ang kalaban nga dautan mitanyag ug kalipay nga dili malungtaron. Ang atong katuyoan ngano nga kita ania karon tungod kay gusto kitang mosunod sa kabubut-on sa Ginoo diha sa pagpabilin nga putli, matinud-anon ug mahigugmaon sa Ginoo.”

Matud pa nila ni Camelle Ermac, taga St. Francis Parish, La Verna, “okay kaayo, daghan akong nakat-unan bisan short lang ang time.” Ingon usab ni Jed Monredondo, Holy Family Parish, Baliok, “lingaw kaayo, naa gyud ko’y natun-an, unta makaapil ako sa sunod tuig, kanang daghan pang mga youth maka-apil.” Ug si Hanna Marie Yarso, St. John Parish, Lasang, “very refreshing, ang atong society karon, kasagaran sa mga youth dili na kaayo aware niining pagtulun-an sa Simbahan. Na-enlighten ako ug thankful, wish naa pa’y gathering ug mas daghan pang youth moapil.”

Gitapos ang kalihukan pinaagi sa Santos nga Yukaristiya nga gipanguluhan ni Fr. Orlando Angelia. Human gihimo ang signing of the chastity covenant sa mga anak gisaksihan sa ilang mga ginikanan. Lingaw ug busog nga nag-inambitay sa “Boodle Fight” lunch ang tanan. (Amie Desquitado | SJP SoCCom)