16 ka mag-uuma gihinumdum sa gitukod nga kapilya

Gisaulog sa GKK San Isidro Labrador Sona 1 nga nahisakop sa Parokya ni San Francisco Javier sa Tibungco, ang ilang ika-70th Kapistahan niadtong Mayo. Ang Misa sa Kapistahan gipangulohan ni Most Rev. George Rimando, DD, ang atong Auxiliary Bishop sa Davao, inubanan sa among Kura Paroko Rev. Fr. Severino A. Capulong Jr. DCD ug ni Rev. Fr. Buddy Jain Cuenca, CSch.

Kasaysayan sa GKK

Ang GKK San Isidro Labrador sa Sitio Buhisan, Tibungco, Davao City usa sa mga kapilya nga mibarog na, sa wala pa mahimong parokya ang San Francisco Javier sa Barangay Tibungco.

Ang Parokya ni San Francisco Javier opisyal nga natukod niadtong tuig 1965 samtang ang kapilya ni San Isidro Labrador natukod niadtong 1947. Ang katukoran sa kapilya ni San Isidro Labrador nahimo tungod sa paningkamot sa 16 ka mga mag-uuma nga milangyaw sa Mindanao gikan sa Cebu. Sila mao si Andres Malabon, Agapito Irog-irog, Eleuterio Goc-ong, Gregorio Seroy, Gregorio Goc-ong, Ismael Rivera, Crisostomo Flandez, Ireneo Moterola, Edelberto Sabas, Santiago Cordova, Leonilo Piyao, Necasio Pepito, Benigno Bation, Sabero Requillas, Eleuterio Quimay, ug Saturnino Noval. Ilang gidala dinhi sa Dabaw ang ilang debosyon sa maong patron sa didto pa sila sa Cebu particular sa Sitio Buhisan.

Tungod kay ang maong lugar kakugonan man, kugon ang orihinal nga atop sa kapilya.

Ang maong kapilya mamisahan kausa sa usa ka tuig lamang nga mao ang kasaulogan sa kapistahan sa patron. Ang pari magagikan pa sa Sa Pedro nga mao karon ang San Pedro Cathedral. Tungod kay kausa ra man ang Santos nga Misa sa usa ka tuig, ang bunyag, kasal ug kompirmasyon himoon panahon sa kapistahan sa patron. Sa paglabay sa panahon, ang kalsada nga nagkonekta gikan sa Siyudad sa Davao padulong sa Tagum naklaro na. Busa midaghan ang namuyo sa Sitio Buhisan.

Sa opisyal nga pagkatukod sa parokya ni San Francisco Javier sa Tibungco niadtong tuig 1965 ang kapilya ni San Isidro Labrador sa Sitio Buhisan usa sa mga kapilya nga nahimong miyembro sa maong parokya.

Sa karon, ang GKK San Isidro Labrador adunay di muubos sa 120 ka mga miyembro nga pamilya. Niining pagsaulog sa ika-70 anyos nga anibersaryo, mapasalamaton kaayo ang mga miyembro sa gitanum nga liso sa 16 ka tawo nga nagpalig-on kanila sa pagtoong Katoliko Kristiyano ug labaw sa tanan, sa Langitnong Amahan, nga luyo sa kahuyang Siya kanunay naghatag ug kusog sa ilang pagpadayon sa pagmantala sa Maayong Balita, pinaagi sa ilang patron, San Isidro Labrador. (Graciano Galendez, Jr. | SFX Pastoral Coordinator | With report from Vivien Bonzon | SFX SoCCom)