SKP 2 gilusad sa Agdao

Hala! Ang Arsobispo!

Dungan nga sulti sa duha ka dili na kaayo batan-on nga mga babaye sa ilang pagsulod niadtong Dominggo sa simbahan sa San Antonio de Padua, Agdao, aron pagtambong sa alas tres nga Misa kon Children’s Mass.

Ngano bitaw nga si Most Rev. Romulo G. Valles man, ang Arsobispo sa Archdiocese sa Davao, ang anaa nga si Padre Boy Roland Ong man ang naga Misa aning orasa?

Diha sa iyang homiliya nadungog sa mga bata, batan-on, ug mga ginikanan ang matuod nga rason.

Gipaila niya ang Sagop Kinabuhi Program 2 (SKP 2); nga kini usa ka “daring Church-led, Church-inspired program” nga tubag sa hagit sa kung unsa ang ikaamot sa Simbahan sa problema sa drug abuse. Pangutana kini sa usa ka Obispo diha sa meeting sa mga Obispo. Ug tuod, kini gitubag diha sa Sagop Kinabuhi Program 1 (SKP 1) nga unang gisugdan diha sa Parokya sa San Antonio de Padua, Agdao, niadtong tuig 2000 sa dihang kura paroko nila si Fr. Bong Gonzaga.

Ang SKP 1 nitubag sa panginahanglan sa mga kabataan o kadtong gitawag nga mga “rugby boys/girls” nga nakahimo og mga krimen sama sa pagpangawat, paglapas sa curfew, pagpanglugos, ug pagpamatay tungod kay lango sila sa pagamit niini.

Ang ika-duhang hugna sa SKP kon SKP 2 naghagit sa Simbahan nga atubangon ang “dili kadula-dulaan nga kahimtang sa drug abuse” diha sa “pro-life style” sa pag-atiman sa kinabuhi sa mga program beneficiaries nga gitawag sa pangalan nga Voluntary Submission for Reformation (VSR) persons.

Nakighiusa diha sa symbolic signing of commitment of support ang kapulisan sa Sta. Ana Police Station, ang barangay captains sa 8 ka barangay sa 9 nga nahisakop sa Parokya sa San Antonio de Padua, ang mga eskwelahan sama sa Assumption College of Davao ug San Pedro College, ang Davao Medical School Foundation College ug MATS College of Technology, ang CSSDO ug ang representante sa Simbahan nga sila Fr. Bong Dublan, ASAC Director, ug Fr. Leonie España, kura paroko sa San Antonio de Padua. Mihatag usab sa ilang suporta ang pipila ka barangay kagawad ug ang Parish Pastoral Council sa maong parokya.

“Ang gugma sa Dios ug ang pagpangga sa Simbahan mao ang diwa sa Programa sa Sagop Kinabuhi 2”, matud pa ni Archbishop Valles. Dugang pa niya nga, kini “dili mo-condemn, dili motulisok” nianang mga VSR tungod kay dako ang iyang pagsalig sa “resulta nga daghang kinabuhi ang makabaton sa kahayag, sa kinabuhi, tungod sa lamdag ug bendisyon sa Dios”.

Magsugod na karong adlawa, Mayo 14, ang pormasyon sa mga VSR persons. (Elena Corazon Mozo | SAP SoCCom)