Pundo alang sa Disaster sa siyudad sa Dabaw giaprobahan

Ang bag-ong ordinansa mahitungod sa pagtugot sa “Davao City Disaster Risk Reduction and Management Fund Investment Plan” sa tuig 2017 giaprobahan na sa Konseho sa Siyudad sa Dabaw ubos sa 16th Session sa 18th Council sa Sanggunian Panglunsod sa Dabaw kaniadtong Abril 25 adlaw’ng Martes.

Kini base sa giandam og giaprobahan sa “Davao City Disaster Risk Reduction and Management Council” sa kantidad nga P286,200,000.00 ka pesos. Gisumiti kini ni 1st district City Councilor Nilo Abellera Jr. ug nahimong ordinansa pinaagi sa “majority vote” sa mga sakop sa konseho nga anaa sa sesyon sulod sa ika-tulo ug pinal nga pagdungog niini kaniadtong Abril 25 ning tuiga.

Gilauman nga magtabang kini sa mga panginahanglanon sa siyudad diha sa mga nagkadaiyang “impact of disaster” dinhi sa siyudad. Sa usa ka pagpakigpulong gisaysay ni Konsehal Abellera ang mga tumong ug tinguha niini na matubag ang mga panginahanglanon sa siyudad mahitungod sa mga programa na may kalimbigitan sa disaster. Gidugang pud niya nga daghan nang mga programa ang mapadayon niini sama sa: Disaster Risk Reduction Program, Flood mitigation Plan, Information System Development ug uban pa.

Giasahan nga kini mapatuman ug pagasugdan dayon base sa nakasaad sa section 6 sa maong ordinansa nga kini mamahimong epektibo dayon human nga kini maaprobahi sa konseho. Gisaysay usab nganha sa section 3 nga kini adunay tuyo nga mapalambo ang tanang “Hazards Panning Approach” nga maoy gamiton batok sa tanang hulga og emerensiya. Gikaingon nga pagapunduhan usab ang tanang mga giila nga proyekto nga giduso sa tanang may kalimbigitan niini ug aron mabarog ang malukpanong pagtubag sa gobyerno na mapakunhod ang epekto sa disaster dinhi sa siyudad. (Rusty Salazar Corsame)