Pastoral visit, blessing sa tulay nagdasig sa mga parokyano sa Malabog

Nagmalampuson ang three-day pastoral visit sa Arsobispo sa Dabaw nga si Arsobispo Romulo G. Valles sa parokya sa San Roque, Malabog niadtong Mayo 10-12, 2017. Human makapahulay sa gabii, nagmisa dayon siya sa sentro sa Malabog pagkaugma alas 6 sa buntag, dayon pagka alas 10, midiretso na siya sa Sitio Malipaga. Miuban niya ang kura paroko sa Malabog nga si Fr. Jemasol Ortiz, Brgy. Captain Jessie Areja, duha ka city engineers, ug mga barangay kagawad. Didto nagmisa siya atol sa ika-44 nga kapistahan sa GKK San Isidro Labrador. Human sa misa, silang tanan miadto sa duha ka tulay aron sa ribbon cutting ug blessing.

Sumala ni Kapitan Areja, ang mga proyekto tubag sa gisumiter nga Brgy. Resolution #32 Series of 2016, ngadto kang Davao City Mayor Sara Duterte niadtong Oktobre 2016. Iyang girequest nga ayuhon ang tulay ug butngan ug usa pa sa managlahing dapit sulod sa Sitio Malipaga, Barangay Malabog. Gisugdan ang patrabaho Pebrero niining tuiga ug nahuman ang mga proyekto unang semana niining bulana.

Nagpasalamat siya kang Abp. Valles nga mao gayud ang nagbendisyon sa mga tulay, sa mga katawhan sa Sitio sa panaghiusa ug tabang ug sa Ginoo kay naaprubahan ang mga papeles.

Daku ang ikatabang sa maong mga agianan, tungod kay mabalhin na ang mga kopras, gulay, uban pang pananum, ug gamit nga mas dali padulong sa Crossing Malabog hangtud sa Proper Paquibato.

Sa ikatulong adlaw, Mayo 12, gibisita ni Arsobispo ang usa pa ka GKK sa Upper Calcal, Sona 8. Didto sa GKK San Isidro Labrador, naminaw siya sa mga coordinator ug mga GKK Servant Leader kabahin sa mga nabuhat nga plano sa matag ministriya. Miani kini ug positibong tubag gikan sa Obispo. Wala siyay nakitang mali, “puro nindot tungod sa pagtinabangay,” matud niya.

Dinhi gilakip niya ug istorya ang tema sa Year of the Parish sa tibook Pilipinas, “Parish as a Communion of Communities.” Panapos niya nga ang parokya “usa ka Kristohanon nga nagaawhag, nagatulak, naga encourage, usa ka federation sa Gagmay’ng Kristohanong Katilingban.” Niuli siya human sa misa nga iyang gisaulog sa GKK San Isidro Labrador. (Imelda Overiz | SRP Malabog SoCCom)