Pagpili sa GKK leaders gihisgutan

Dili pa lamang dugay nahuman ang GKK Leaders General Assembly sa St. Francis of Assisi La Verna. Nabatasan na sa maong parokya nga ang maong asembliya ipahigayon sa bulan nga adunay 5th Sunday.

Busa niadtong Abril 30, 2017, ikalimang Dominggo sa bulan diin napatigayon ang maong panagtigum. Gilatid sa maong asembliya ang mga plano sama sa Dinner for a Cause.

Ang mga detalye niini gipresenta ni Bro. Robert Herrero, chairman sa Ways and Means Committee sa parokya. Ang maong kalihukan ipahigayon karong July 21, 2017 sa Davao Convention Center.

Gipasabot usab ni Mai Mai Quibol, catechist head sa parokya ang proseso sa pagpili sa mga lideres binasi sa yellow book nga mao ang Norms and Guidelines sa GKK. Gi review usab ni Mai Mai ang Rules and Function sa mga lideres. Aron makapili ug maayong mga lideres ang matag GKK mihatag ug mubo ug malangkubong pormasyon si Fr. Junar dela Victoria, ang kura paroko binasi sa basahon ni propeta Nehemias.

Matud pa ni kura paroko Junar ang usa ka lider kinahanglan adunay voice (tingog), heart (kasingkasing), mind (hunahuna) nga dili lamang magpunting sa iyang kaugalingon kondili ngadto sa iyang mga membro sa katilingban. Kini dili lamang usa ka tawhanong lider kondili usa kini espiritwal nga lider. “Gikinahanglan ang Ginoo maoy atong kauban sa pagpangalad aron maangkon sa matag usa ang hiyas sa maayo ug epektibo nga lider”, panapos ni Fr. Junar. (Sylvia Orbeta | SFA La Verna SoCCom)