Mga PSL sa Tagakpan, Malipayong Midawat ug Nanumpa sa Tawag sa Pagserbisyo

Gisaulog sa mga parokyano sa San Francisco de Asis Parish – Tagakpan ang Bihilya sa Pasko sa Pagkabanhaw sa atong Ginoong Hesukristo niadtong Sabado de Gloria, Abril 15 sa alas 6:30 sa gabii. Ang maong selebrasyon gisugdan sa Pagbendisyon sa Kalayo, gisundan sa Santos nga Misa nga gipangulohan sa kura paroko nga si Rev. Fr. Peter Fancubila, OSJ, uban ni Rev. Francis Elly Capuno, OSJ, usa ka deacon.

Matud pa ni Fr. Peter sa iyang homiliya “Si Jesus nabuhi ug daghan ang nagtoo kaniya, mao nga daghan ang mga kristiyanos. Siya ang alpha ug omega nga maoy magboot sa atong sinugdanan ug katapusan. Gisulti usab ni Fr. Peter nga gihalad ni Kristo ang iyang kaugalingon aron kita iyang bantayan ug para sa atong kaluwasan.”

Sa sulod sa maong selebrasyon, gipadala ug na-naad pag-usab ang mga Pangulo sa Liturhiya sa parokya.
Matud pa ni Mr. Jesus Embad, PSL gikan sa GKK San Roque – Crossing, “Nalipay ako pag-ayo kay gitawag ako sa pag-serbisyo sa Diyos. Mapadayonon ako sa pagtubag kay nakita ug nasinati naku ang mga grasya nga gihatag sa Ginoo sa akong pamilya ilabina ang maayong panglawas ug paglahutay sa pagserbisyo. Kay kung moundang ako maluya kami sa among pagtoo sa Dios.”

Si Mr. Embad ug ang ubang PSL malipayon nga nagbag-o s sa ilang panaad, ug aduna sila’y panglantaw nga ila pa gayud nga mapaambit ang maayong balita sa Ginoo sa ilang tagsa-tagsa ka mga GKK.

Pagkahuman sa misa, ang tanang PSL nilibot sa parokya. (Mary Jane Alba, SFDA SoCCom)