MAM Summit gipahigayon sa Subangan Museum

Subangan Museum

MATI CITY — Usa ka dakong panagtigom ang mahitabo sa siyudad sa Mati karong Mayo 17-19, 2017. Kini ang 28th Regional Summit sa Mindanao Association of Museums (MAM) kon diin magtapok ang mga eksperto, mga miyembro sa MAM, ug ubang interesado sa buhat sa museyo.

Tungod sa prestihiyosong imahe sa Subangan Museum sa siyudad sa Mati, gipili kini isip venue alang sa maong talagsaong panghitabo. Gipaabot ang mga banggiitang siyentipiko, manunulat ug educators nga nakakaplag og mga mahinungdanong butang kalabot sa kinaiyahan sa nagkadaiyang lugar, labi na sa Cagayan de Oro City, Surigao ug Iligan.

Labot niini, giila usab ang kamahinungdanon sa Subangan Museum nga nagalarawan sa mga gitago/gipreserbar nga artifacts ug lumadnong hiyas sa kultura ug sa Davao Oriental sukad sa una pang mga panahon.

Atol sa talagsaong higayon sama niini, gidapit ni MAM president Remedios G. Barretto, Ph.D. ang si kinsa mang gusto motambong, maminaw, makakat-on ug mopa-ambit sa panagtigom karong Mayo 17.

Napili nga tema ang “Curating Heritage and Environment” – ang pagmaneho ug pagpreserbar sa kabilin ug kinaiyahan.

Kahinumduman nga sa miaging DAVRAA sa bulan sa marso, nag-uros-uros ang gidaghanon sa mga mibisita sa Subangan hinungdan nga gitahong mi-doble ang kita [income] sa museum alang sa bulan sa Marso. Si Manager Lyrna Padohinog miingon nga ang kinatibuk-ang 1,562 ka mga turista gikan sa gawas ang midoble sa ilang gipamaligya nga tickets sa entrance gate. Gikan sa total income nga mga Php 91,000 sa Pebrero, mitaas ang income sa Marso sa Php 197,665.

Ang Subangan, usa ka dakong proyekto ni kanhi Gobernadora ug karon 1st District Representative, Cong. Corazon Nuñez Malanyaon, pormal nga gi-abre sa publiko sa tuig 2014 ug gikonsidera nga labing dako sa Rehiyon sa Davao nga gituohang makapalambo usab sa ekonomiya sa probinsya sa DavOr, gawas sa pagpalapad niini sa natad sa kultura ug sa turismo. Sa Subangan makita ang 53-feet kalabira sa sperm whale, mga exhibit sa flora ug fauna gikan sa lain-laing lugar labi na ang gikan sa Mt. Hamiguitan World Heritage Site, ug ang life-size display sa Mandaya-ong kultura. Gilaumang moabot ang mga opisyales sa MAM sama nila Barretto, Chairman Edmundo R. Acaylar, Vice President Ma. Lalaine Chieng, Secretary Antonio J. R. Montalvan, ubp. Ang registration fee alang sa tulo ka adlaw mokabat og Php 1,500.00. (Kauban ni Riza M. Golez)