HOSPITAL pa more

Duha ka inahan, duha ka istorya ang akong itanyag kaninyo atol sa selebrasyon sa Mother’s Day. Ang atong mga nanay gikan sa parokya sa San Pedro Calungsod, Baguio District. Happy Mother’s Day!

HOSPITAL pa more

Usa ana ka adlaw, na admit akong anak. Naglibog ko ug asa ko mangita ug kwarta tungod kay dako ang among bill sa hospital. Maayo na lang nag round ug sayo ang doctor ug gistoryahan nako siya nga “dok wala gud miy kwarta, unsaon mana nako.” Ang advice sa doctor sa ako, “muduol ka ug Lingap magdala lang ka ug medical record, billing, ug barangay certificate. Sayo sa buntag adto naka sa City Hall sa Lingap room, or magpangutana lang ka didto.”

So, sayo sa buntag mao jud akong gihimo. Pag abot nako sa City Hall wala pa nag abli, nigunit ko ni San Pedro, nag-ampo jud ko nga makakita jud ko ug pambayad sa hospital. Pagkahuman open na, nagpila ko ug gikaloy-an g’yud ko sa Ginoo, kay bisan dili kompleto ang requirements nga ako gidala sa pag interview sa ako, gihatagan g’yud ko ug voucher nga nagkantidad ug P10,000.

Mao nang nakaingon g’yud ko sa akong kaugalingon nga pinangga g’yud ko sa Ginoo. Na inspire g’yud ko sa akong kaugalingon nga mo-serve g’yud ko sa iyaha kay dili gyud diay ka niya pasagdan kung kanunay kang musangpit sa iyaha. – Nanay 1

ANSWERED PRAYER

Isip ginikanan, wala g’yud tay laing tumong ug damgo sa atong mga anak nga sila mahimutang sa maayong dalan ug makakab-ot sa ilang mga pangandoy sa kinabuhi.

Usa ko sa nagatoo sa Ginoo. Nag attend ko ug novena sa Shrine 2 years ago. Nag-apil ko ug 9 weeks nga novena with a prayer nga unta ihatag sa akong anak ang kalampusan ug unta kung dili man, iya untang madawat kung unsa man ang pagbuot sa Ginoo.

Kay si Lord man g’yud ang nasayod sa tanan, ug sa ika 9th week sa akong pag attend ug novena nga mao ang kapistahan sa Sto. Niño, ning apil ko ug procession. Ulan ug daghan kaayong mga tao apan nakaingon ko sa akong sarili, “Lord kung pagsulay man ni, okay lang kay ako ning gihimo alang sa akong anak.”

Ug sa akong pagpauli nibaktas ko padulong sa ubos bisan sa kakusog sa ulan. Nalingaw ko sa katawhan nga bisan layo nag-antos g’yud, malipayon lang gihapon. Sa akong pag abot sa balay, sa wala lang damha, gisugat ko sa akong anak. Malipayon siya nga nagbalita nga pasado na siya sa board exam. Nakaingon ko sa Ginoo “Lord answered prayer gyud! Thank you and thank you Lord!” ug karon regular na siya sa iyang trabaho. – Nanay 2