Flores de Mayo gilusad sa parokya sa Agdao

Nahitabo niadtong Abril 30 ang gipaabot sa mga kabataan nga mao ang pormal nga pagsugod sa “Flores de Mayo” diha sa usa ka “mabulakong” selebrasyon. Nakasuot og anghel nga costume ug mga nakaputi ang mga kabataan nga midugok sa Simbahan sa San Antonio de Padua, Agdao, sa alas dos sa hapon aron sa pag-apil niining selebrasyon.

Nagsuot usab og puti ug itom nga palda ang 24 ka mga bag-ong Pangulo sa Pagpanudlo (PSP) ug ang cream and brown uniform sa 90 ka daan nga mga PSP.

Mihalad sa nagkalain-laing klase sa bulak ang mga kabataan kang Birhen Maria human ihalad ang pag-ampo sa Santos nga Rosaryo. Misunod dayon ang Santos nga Misa nga gipangulohan ni Padre Boy Ronald Ong. Apan, sa dihang i-send forth na ang mga PSP, iyang malipayon nga gipa-ila ang Kura Paroko, nga si Padre Toto España, aron sa pagbuhat sa maong pagpanumpa ug pagpadala niining mga katekista sa mga GKK.

Buluhaton sa mga PSP ang pagpahigayon sa Flores de Mayo diha sa GKK. Sa pagbuhat niini, si Kristo gayud, ang ilang masaligan nga kauban. Kay sa giingon pa ni Padre Ong, nga sa matag kalisdanan o kasakit nga agian kinahanglan nga hunahunaon sa tawo nga dili gayud siya biyaan ni Kristo ” sa kanunay kauban nato Siya, dili kita Niya biyaan,” matud pa ni Padre Ong.

Gipadala ang 114 ka katekista o PSP ni Padre Toto uban sa panalangin sa usa ka makanunayong pagbuhat sa ilang misyon sa pagpakaylap sa Maayong Balita. (Elena Corazon Mozo | SAP SoCCom)