Duha ka Bulawanong Selebrasyon Gisaulog sa Divine Mercy Parish sa Mati

Sa dili pa lamang dugay ang Parokya sa Divine Mercy sa Diocese sa Mati malampusong nagsaulog sa duha ka bulawanon ug mahinungdanong selebrasyon — ang Semana Santa ug ang ika-napulog usa nga Pista sa Parokya.

Naghatag gayud og igong higayon ang mga apostolado sa pagpangandam aron saulogon ang Semana Santa, panahon nga gigahin sa simbahan sa paghinumdum sa pagpasakit ug sakripisyo sa atong Ginoong Hesukristo.Tungod niini, nahimong malampuson ug mabungahon gayud ang pagsaulog sa Semana Santa sa parokya. Adunay pipila ka mga maanindot nga kabag-ohan kabahin sa mga lihok diha sa pagsaulog sa liturhiya. Labaw sa tanan dayag kaayo ang partisipasyon, pagtinabangay, ug panaghiusa sa mga nagkadaiyang apostolado lakip ang mga myembro nga nagagikan sa 29 Gagymayng Kristohanong Katilingban nga nahisakop niining parokya. Ang matag katilingban mipaambit sa ilang panahon, grasya ug talento isip ilang gasa ngadto sa Dios. Dayag kaayo ang kadaghanon sa mga nitambong sa matag selebrasyon nga nagpunting sa misteryo sa pagpasakit, kamatayon ug pagkabanhaw sa atong Ginoo karong tuiga. Namatikdan gayud ang ilang pagpaningkamot ug pagsakripisyo nga makalahutay gikan pa sa Domingo sa Lukay hangtud sa Domingo sa Pagkabanhaw. Ang matag presensiya ug partisipasyon sa mga nitambong sa matag selebrasyon nagpadayag sa ilang pagtuo, paglaum ug gugma ngadto sa Dios.

Dugang pa, mabungahon usab ang Parokya sa Divine Mercy diha sa pagsaulog sa Semana Santa tungod kay nakahigayon usab sa paghatag og serbisyo isip buhat sa kalooy ngadto sa mga piniriso sa Provincial Jail pinaagi sa paghatag og “Lenten Recollection”, ug pagpahigayon sa sakramento sa pagkumpisal ug Santos nga Eukaristiya.

Human sa pagsaulog sa Semana Santa, tataw kaayo ang kakapoy nga gibati sa kura paroko ug sa matag tawo ilabina sa mga apostolado niining parokya apan wala kini nila panumbalinga tungod kay gisaulog usab nila ang ika-napulog usa nga Parochial Fiesta atol sa ikaduhang Domingo sa Pagkabanhaw (Abril 23, 2017) nga sukad pa sa sinugdan latas sa mga katuigan kining adlawa mao ang pagsaulog sa Diosnong Kalooy. Ang tema sa ilang pagsaulog sa kapistahan mao ang: “The Parish Communion of Communities: Forming BEC’s as agent of Communion, Participation, and Mission”.

Malampuson ug mabungahon gayud ang pagsaulog sa kapistahan tungod kay sa bispera adunay nahitabo nga pagbunyag nga gihimo ni Rev. Fr. Philip C. Dimalanta, sakramento sa pagkumpirma nga gihimo ni Rev. Msgr. Edito S. Baño – Apostolic Administrator, ug prosisyon sa imahe sa Diosnong Kalooy ug ni Sister Faustina. Sa adlaw mismo sa kapistahan gipahitabo ang duha ka misa. Ang unang misa sa alas saes sa buntag gipangulohan ni Rev. Fr. Marven G. Ruyeras, MI, ug pagka alas nuebe mao ang Concelebrated Mass nga gipangulohan ni Rev. Msgr. Patricio H. Alo, Obispo Emeritu uban ni Rev. Msgr. Edito S. Baño nga maoy naghomiliya.

Human sa Eukaristikanhong kasaulogan, misunod dayon ang pagpakaon sa mga katawhan nga mikabat kapin usa aka libu nga nagagikan sa nagkalainlaing lugar particular mente sa matag GKK nga nahisakop niining parokya. Pagkagabii gipahitabo ang Coronation sa Miss Divine Mercy ug Fellowship. Sa unang higayon, ang mga katawhan wala lamang na-entertain sa mga pasundayag, pagrampa sa mga kandidata, ug live band apan gipahalipayan usab sila pinaagi sa libreng pagkaon ug pag-inom gikan sa usa ka tawo nga malumo ug manggihatagong kasingkasing. Sa maong gabii usab gipahitabo ang Raffle Ticket diin ang nalikom nga kita pagagamiton unya sa pagpahuman sa Parish Hall.

Nahimong malampuson ug mabungahon gayud ang duha ka selebrasyon sa Divine Mercy Parish tungod sa pagpaningkamot sa mga myembro sa Parish Pastoral Coordinating Council (PPCC) nga gipangulohan ni Mrs. Florentina Magpusao uban sa giya sa ilang maayong “organiser’ ug buotang pari nga si Rev. Fr. Medardo A. Salomia diin nagsaulog sa iyang ika-38 nga anibersaryo sa pagkapri. Ang PPCC maoy derekta nga nag-coordinate sa tanang mga kalihokan sa parokya. Matud pa ni Fr. Salomia, “if trust is given to the key people especially the PPCC and they will be given a chance to participate, then, their response is noticeable and they will become empowered”. Ang maayong pagtagad ug pagdumala ni Fr. Salomia sa iyang mga gitugyanan og responsibilidad maoy nakapalig-on gayud sa ilang relasyon ug nakapadasig sa paghimo sa mga buluhaton nga malampuson.Tataw kaayo nga ang sangputanan sa maayong relasyon mao ang panaghiusa ug partisipasyon diha sa pagkab-ot sa kalampusan sa mga buluhaton sa simbahan ug pagbuhat sa Kristohanong misyon.

Sa katapusan kinasingkasing ang pagpasalamat ni Fr. Salomia sa tanan nga nahimong kabahin sa kalampusan sa duha ka sa selebrasyon. Nagpasalamat usab siya niadtong mga tawo nga walay puas sa pagpaambit sa ilang bahandi alang sa kaayohan ug kalambuan sa parokya. (Randy Simon Osiba)