Dinner for a cause, election ipahitabo sa La Verna

Dili pa lamang dugay nahuman ang GKK Leaders General Assembly sa St. Francis of Assisi La Verna. Nabatasan na sa maong parokya nga ang Assembly ipahigayon sa bulan nga adunay 5th Sunday. Busa niadtong Abril 30, nakasabutan nga ipahigayon ang Dinner for a Cause karong Hulyo 21 sa Davao Convention Center ug GKK Leaders’ Election base sa GKK Norms and Guidelines. Gipasabot ni Maimai Quibol, ang Catechist Head sa parokya, ang processo sa pagpili sa mga lideres ug ang mga roles and functions nila.

Aron makapili ug maayong mga lideres ang matag GKK, naghatag ug hamubo ug malangkubong pormasyon si Fr. Junar Dela Victoria, ang kura paroko base sa basahon ni Propeta Nehemias.

Matud pa ni Fr. Junar, ang usa ka lider kinahanglan adunay voice (tingog), heart (kasingkasing), mind (hunahuna) nga dili lamang magpunting sa iyang kaugalingon kondili ngadto sa mga miyembro sa katilingban. Kini dili lamang usa ka tawhanong lider kondili usa kini ka spiritual leader. “Gikinahanglan ang Ginoo maoy atong kauban sa pagpangalad aron maangkon sa matag usa ang hiyas sa maayo ug epektibo nga lider,” sumala pa niya. (Sylvia Orbeta | SFDA SoCCom)