Davao Oriental gipahingusgan ang produksyon sa palay

Hugot nga gipaningkamutan sa panggamhanang probinsyal sa Davao Oriental (DavOr) nga mahingusgan ang produksyon sa palay, dili lang sa Banaybanay nga maoy “rice granary/rice capital sa DavOr ug sa Davao region” kondili sa lungsod usab sa Cateel sa Contra-costa nga adunay halapad nga potensyal sa ‘rice farming.’

Kini, tungod usab sa presensya sa dakong Cateel Irrigation Project nga gipondohan sa World Bank, DA, MRDP, ug provincial government, ug nahimong hinungdan sa pagtaas sa gidaghanon sa ani sa palay. Segun sa datus sa PIO, ug sa PHL Statistical Authority, misaka ang “rice sufficiency level” gikan 74% sa 2015 ngadto sa kasamtangang 95%. Ang gitarget sa panggamhanan mao ang 100% rice sufficiency sa higayon nga mahimong “fully operational” ang mga kanal sa tuo ug wala ka bahin niini. Apan aron matuman ang gipangandoy nga 100% rice sufficiency, pahingusgan ang pagpananom og palay ug pagpalapad sa palayan sa Cateel, Davao Oriental nga gipatubigan sa Cateel Irrigation System sa Barangay Aragon.

Ang irigasyon ang nagpatubig sa dul-an 2,000 nga ektaryang palayan samtang gihimo ang dissilting sa mga canal. Gisiguro usab sa probinsiya nga adunay matanum ang mga mag-uuma, hinungdan nga nanghatag kini’g mga hybrid ug registered palay seeds lakip ang mga fertilizer ug mga inputs ug tech-support alang sa mga mag-uuma. Kini ang gipahayag ni Davao Oriental Agriculturist Rotchie Ravelo, sa iyang pagpasabot usab nga dako kining pag-angat gikan sa kanhi 44% niadtong 2007. Niadtong tuiga, 12,000 ka ektarya ang gikatahong gitamnan og palay ug gipaningkamutan karon sa probinsyal nga panggamhanan nga mahimo kini karong tuiga og 23 mil ka ektarya. Dugang pa niya nga padayon usab ang pagpangita sa provincial government ug dugang mga luna nga matamnan ug palay. Samtang gituon ang inter-cropping sa mga high value crops, utanon, melon, mani, cacao, ug cardava aron madungagan ang kita.

Napasidunggan na ang DavOr isip usa sa napulo nga top rice-producing provinces sa nasud.