Asembliya sa hospitalization program gipahigayon

Gipahigayon ang unang asembliya sa 286 nga membro sa parish hospitalization assistance program sa parokya sa St. Mary of the Perpetual Rosary niadtong katapusang adlaw sa Abril sa St. Mary Parish Sports for Peace and Livelihood Training Center.

Nagsugod ang maong programa sa dihang nagpanday sa annual plan ang Parish Social Action Ministry (PSAM) niadtong Nobyembre 29-30, 2012. Sukad adto ang programa gidumala na sa PSAM, subay sa sugyot sa kura paroko nga si Fr. Jess Samaniego ug sa panguna sa PSA Coordinator Joel Corage.

Gipaningkamutan nga ang parish hospitalization assistance program mamahimong makanunayon ug mapadayonon. Tumong niini ang magpakabana ang katawhan pinaagi sa pagtabang pinansyal sa mga nag alagad boluntaryo sa parokya, GKK Servant Leaders ug Tigpasayon sa Pundok Banay kon magkasakit unya maospital. (Josephine Galorio, PSA | Hermie Mapute | SMPR SoCCom)