Ang Marian Movement of Priests sa Pilipinas

Niining Hubileyo sa Sentenaryo sa Fatima, ang Marian Movement of Priests (MMP) dinhi sa Pilipinas, nagpahigayon sa unang MMP National Congress didto sa Talamban, Cebu City, sulod sa San Carlos University Amphitheatre, niadtong Mayo 6-8, 2017. Kapin sa 300 ka partisipantes naggahin og panahon sa pag-apil, lakip niini ang 20 ka mga Pari, 4 ka Obispo ug daghang mga LAYKO gikan sa Luzon, Visayas ug Mindanao.

Ang MMP nakagamot sa Fatima tungod kay ang maong kalihokan didto sa Fatima nagsugod niadtong Mayo 8, 1972, pinaagi kang Padre Stefano Gobbi. Mao nga ang maong panaghaugpong, nga karon anaa na sa 5 ka kontinente sa kalibutan, giila nga iya sa Birhen sa Fatima. Siya ang nagtukod ug siya usab ang nangulo. Nagsugod sa panagtigom sa 3 ka Pari lamang niadtong 1972 nga gitawag og Senakulo sa pagampo ug sa inigsoong panag-ambitay. Karon libo libo na ka mga gagmayng senakulo ang ginapahigayon sa tibuok kalibutan.

Si Bishop Oscar Jaime Florencio, Auxiliary Bishop of Cebu, sa ngalan ni Arsobispo Jose Palma, ang nagwelcome sa mga partisipantes. Ako ang Keynote speaker. Si Bishop Precioso Cantillas, Abp. Ramon Arguelles ang ubang mamumulong nga Obispo. Adunay mga Pari si Fr. Dan Arrante (Cam Sur), Msgr Ruben Espeno (MOP), Fr. Erick Entuna (Maasin) nga nagpahayag ug mga kasinatian sa ilang pag-apil sa MMP. Mga laykong lalaki ug babaye nagpahayag usab sa ilang kasinatian uban sa mahal nga Birhen nga mitabang kanila aron mabag-o ang ilang kinabuhi. Si Fr. Roland Sayman (Mati) nagpahayag bahin sa mensahe sa Fatima. Si Bro. Reynald Andales sa WAF naghatag og gamay nga pagpasabot sa WAF. Si Bro. Henry Ocier naghatag ug pamahayag bahin sa Grupo da Imaculada, tanan mga Kalihokan nga konektado sa Fatima.

Ang MMP dinhi sa Pilipinas nagsugod pa niadtong dekada 70. Ang mga layko ang nanguna, unya mikaylap sa mga Pari. Niadtong 1980 mibisita si Padre Gobbi dinhi sa Pilipinas. Didto sa Cebu, nakadawat siyag mensahe gikan sa Mahal nga Inahan alang kanatong mga Pilipino, nga karon nahisulat na diha sa Libro sa MMP – “Tan-awa ang mga kasingkasing ug ang mga kalag niining tanan kong mga anak: pagkamatinud-anon, kaayo nila kang Jesus, nagmahal kaayo sila kanako ug hilabihang nahiusa sa Simbahan. Pinaagi kanila ang kahayag sa akong kasingkasing mikaylap sa tanang kanasuran niining tibuok kontinente. Aduna akoy dakong laraw niining katawhan. Nakapalipay sila kanako tungod sa ilang pagkayano, sa ilang debosyon, sa ilang dakong kakabus, sa ilang pagkamapaubsanon ug pagkamapailubon.” (message 210 c,d).

Gipahayag sa atong Mahal nga Inahang Maria ang iyang kalipay mahitungod sa atong buhing pagtoo sa Dios ug sa Simbahan. Gipahayag usab niya ang iyang laraw alang kanato, diha sa pagpakaylap sa debosyon Kaniya ug sa iyang Anak nga si Jesus. Kini ang dakong hagit kanatong tanan — ang pagpadayon sa atong panaw sa pagtoo ug pagpalambo ug pagpabunga pa niini’g daghan.

Busa angayan lang gayod nga didto na usab sa Cebu gipahigayon ang unang Kongreso sa MMP human sa kapin 3 na ka dekada dinhi sa Pilipinas. Angayan lang usab nga gipahigayon ang maong panagtigom atol sa unang Sabado sa bulan sa Mayo ug sa ika-45 nga kasumaran sa pagtukod sa MMP didto sa Fatima. Ang MMP nagpasalamat ug nagpasidungog gayod sa Birhen sa Fatima tungod niining mga talagsaong hitabo sa kasaysayan sa MMP. Alang sa dugang kasayuran bahin sa MMP gidasig ko kamong tanan ilabi na ang mga kaparian nga log on sa www.mmp-phil.org.