“Tuig sa Parokya isip Nag-inambitay nga Katilingban”

Kini ang nahaom nga tema sa pagsaulog sa balaang panahon sa Semana Santa hangtud sa Pasko sa Pagkabanhaw sa atong Ginoo, pinasikad sa hiniusang tingog sa pag-inambitay sa mga pangulo sa Gagmay’ng Kristohanong Katilingban (GKK) ug Lay Organizations, Movements and Associations (LOMA) sa parokya sa San Nicolas de Tolentino Cathedral, Mati.

Sa panahon sa pagpangandam, gikauyunan nila Apostolic Administrator ug Parish Priest Fr. Edito “Ed” S. Baño ug iyang mga kaubang pari nga ang mga kalihukang ipahigayon, dili lamang diha sa katedral apan didto usab sa mga layong GKK aron masinati ug mapaambit gayud sa mga parokyano ang halawom ug makahuluganong pagsaulog sa pagpasakit, kamatayon ug pagkabanhaw sa atong Ginoo.

Mga sakop sa managlahing relihiyosong kongregasyon gikan sa Association of Religious in the Diocese of Mati (ARDM) ang gidapit sa pagdumala sa gipahigayon nga Lenten Recollection. Human sa pamalandong gipahitabo ang Sakrameno sa Pakig-uli kon diin unom ka pari ang naglingkod sa mga kumpisalan. Gitapos ang recollection sa kasaulogan sa Eukaristiya, ang pagdawat sa buhing Lawas ug Dugo sa atong Manunubos. Sa sunod adlaw sa Huwebes Santo, Abril 13, 2017, misaksi ang katawhan sa pagbag-o sa kaparian sa ilang mga panaad sa pagkapari atubangan sa presider, si Bishop Emeritus Patricio H. Alo, DD, kinsa usab mibendita sa mga balaang lana sa Misa sa Krisma.

Mapasalamaton usab si Fr. Ed sa iyang mga parochial vicar nga sila Fr. Mario C. Jimenez, DCM ug Fr. Elezer D. Pagkilatan, ug ubang mga pari nga mitabang aron mahimong hapsay ug tunhay ang mga kalihokan sa tanang oras ug dapit. Lakip sa mga paring relihiyoso mao ang duha ka parng Agustino nga sila si Fr. Antonio Nombrefia, OSA ug Fr. Candido Salandagar Jr., OSA, samtang apil usab si Diocesan Chancellor Fr. Pedrito Mapayo, DCM.