‘Poor but deserving students’, may trabaho

DAVAO ORIENTAL — Kapin tulo ka gatos ka mga kabus nga estudyante ang nakaapil sa unang batch nga nakatrabaho ubos sa ‘Special Program for the Employment of Students’ (SPES), samtang gi-target ang dugang 200 pa ka alang sa ikaduhang hugna.

Kini ang nasayran gikan sa hiniusang paningkamot sa Department of Labor and Employment (DOLE) ug sa Panggamhanang Probinsyal sa ilahang pagduso sa programa nga nagtumong sa paghatag og tabang pinansyal sa mga nagalisud apan adunay katakus nga mga tinun-an.

Matud pa sa Provincial Manager sa Public Employment Services Office (PESO), Jay Dayanghirang, gilantaw nila ang ekonomikanhong istado sa pamilya. Kadaghanan sa mga ginikanan sa mga benepisyaryo mga mag-uuma o “self-employed” kansang net income wala molabaw sa Php 136,000.00 kada tuig. Ang matag SPES beneficiary maswelduhan og Php 6,800 sulod sa 20 lamang ka adlaw sa ilahang pagpanarbaho sa managlahing buhatan sa Provincial Government.

Si Niccolo Andrie Flores, grade 12 student sa 1st batch, miingon nga dako ang ikatabang sa programa tungod kay lisud na ang hinabang gikan sa iyang 80-anyos nga apohan nga maoy nag-abag sa iyang pagtuon.

Samtang si Michelle Ann Corpuz miingon nga maibsan ang galastuson sa iyang mga ginikanan, samtang maandam usab sila aron sa umaabot nga pagpanarbaho, “pinaagi sa training, especially on how to deal with the professionals,” sumala ni Michelle. “This also enlightens us on the value of work in order to earn money. I think it gears us for the future.”

Lakip sa mga kalihokan sa SPES beneficiaries mao ang pagtudlo sa pagtahod sa kinaiyahan ug pagsabot sa realidad sa ‘climate change ug ecological waste management’ pinaagi sa usa ka evironmental awareness symposium ug tree planting activity niining bulana sa Barangay Mayo, siyudad sa Mati, ug clean-up drive sa Brgy. Central.

Human sa sports activity sa samang bulan, nagsugod na sila ug panrabaho sa mga opisina sa gobyerno sa Davao Oriental. (Sr. Marietta Alo | Riza M. Golez)