Pari: LCCP Ministry, halangdon sa Simbahan

Nagmalampuson ang gipahigayong Send Forth ug Renewal Recollection sa mga Lectors, Commentators, Cantors, ug Psalmists (LCCP) sa Mary Help of Christians Parish niadtong Abril 8. Gilangkuban kini ug 173 ka mga lector nga gikan sa nagkadaiya-iyang GKK nga sakop sa maong parokya.

Ang programa gisugdan pinaagi sa Santos nga Misa nga gipangoluhan ni Fr. Marcelino Benabaye SDB. Sulod sa misa, gipadala ug gibendisyunan sila. Sa homiliya ni Fr. Ben, iyang gipalawom kung unsa ang buluhaton isip usa ka mambabasa, unsa ang kinaiya niini ug kung unsa ka halangdon ang maong ministriya. Gipatuhop jud sa kura paruko ang pulong sa Ginoo sa mga partisipante aron mamahimo silang ehemplo sa ilang tagsa-tagsa ka mga GKK.

Pagkahuman sa misa, gisugdan na dayun ang unang session sa recollection diin si Mrs. Leoncia Darunday ang naghatag sa anindot nga kanta. Nagpili ang mga partisipante ug mga linyang nakapatandog nila hilabina sa ilang kinabuhi. Human sa pagpaambit, nagpakita ug usa ka video nga “The Father’s Letter” ang mga organizer. Didto gipakita kun unsa ka mahal sa Dios ang iyang mga anak dinhi sa kalibutan ug naghatag kini ug pagtulon-an ug usa ka pangutanang nakapahagit sa mga partisipante nga mamahimong anak sa Ginoo.

Ang ikaduhang session gipaambit sa usa ka seminarista gikan sa St. Francis Xavier Seminary nga si Brother Ramir. Gipalawman niya ang kahulogan kung unsa ang buhaton sa usa ka mambabasa sa simbahan. Pagkahuman naghatag ug usa ka aktibidad si Ms. Corazon Aglipa diin nangita ug pares ug namalandong sila sa mga bersikulo ug panghitabo sa Bibliya nga nauyon sa ilang kinabuhi. Nanguli silang adunay natun-an ug kalipay. (Charlyn Catao Bayo | MHCP SoCCom)