Lukay, Hulagway sa Kadaugan

“Hosanna Filio David, benedictus qui venit in nomini Domini, Hosanna in excelsis” Ang Matuod nga Simbahan (Katoliko) nanudlo mahitungod sa katapusang semana sa misyon sa atong Ginoo sa dinhi pa siya sa yuta. Natala sa bag-ong tugon nga human gibanhaw ni Jesus si Lazaro (Juan 11:38-44), miadto siya sa Jerusalem ug didto iyang gipakita pinaagi sa mga simbolo nga siya ang mesiyas nga dugay ng gipaabot sa ilang katigulangan (Juan 12:13). Ang iyang kadaugan gisimbolohan niadtong tungura pinaagi sa palma o lukay (Mateo 21:1-11). Nasayod ang atong Ginoo nga hapit na ang adlaw aron maghari ang iyang kadaugan. Ang lukay nagpadayag sa misyon sa atong Ginoo – ang pagluwas sa iyang katawhan pinaagi sa iyang pagtuman sa sugo sa iyang Amahan (Juan 17:21). Ang paghandum sa sagradong panghitabo niining semana santa maoy pinaka tumoy nganong nagsaulog ta ug kwaresma. Ang Domingo de Ramos (Bendita sa Lukay) maoy katumanan sa mga panagna sa mga propeta sa daang tugon – nga ang Hari sa Israel magsakay ug asno (Zac 9:9) timaan nga gikan sa trono ni David (1 Hari 1:33-34) nga gibukhadan ug kupo sa mga tao (2 Hari 9:13) ug gidayeg sa mga pulong “Hosana sa kahitas-an” (Salmo 118:26). Sa atong kinabuhi, kinahanglan nga kita magpakalukay – timaan ni Kristo alang sa uban. Nga diin maghari ang iyang gingharian ug mensahe ug atong puy-an ug ipaambit sa uban. Paminawa matag martes 8-9pm ang programa Sub Umbra Petri (Ubos sa landong ni Pedro) sa Giya sa Pagtuo, DXGN 89.9 Spirit FM. Ave Maria! (Bro. Ryan R. Mejillano | CFD | Latin Mass Society of Davao, Inc.)