Lenten Recollection: Baliklantaw alang sa dugang kadasig

Gisugdan ang recollection sa 100 ka mga PSL sa St. Mary of the Perpetual Rosary Parish niadtong Marso 12, 2017 didto sa San Isidro Labrador GKK, Juliville pinaagi sa usa ka Via Crusis. Dinhi gipamalandungan ang kasakitan, kamatayon ug pagkabanhaw sa Ginoo. Human sa pagpamalandong sa Misteryo Paskwal sa Ginoo, gihatag ni Fr. Ritsche Gamaya ang usa ka pagtulon-an sa Simbahan – ang Evangelii Gaudium (ang kalipay sa Ebanghelyo).

Dinhi gisaysay ni Fr. Ritsche ang kalipay ug kamaya kon mapuy-an ang Ebanghelyo. Gikan sa kaguol ug kahingawa ug sa ka peligro nga mahitumpawak ang kalibutan sa walay pagpakabana tungod sa gidala sa konsumerismo, anaa ang hagit sa Ebanghelyo nga pakiglambigit sa atong isigkatawo ug paglantaw sa kaayohan sa uban.

Sumala ni Fr. Ritsche, ang Pulong sa Dios kanunay nga lab-as ug nahitabo sa atong kasamtangang panahon, ug ang Ebanghelyo nagpahinumdum sa buhing kasaysayan nga nagdala kanato karon sa kasamtangan. Dugang niyang gipahingusgan nga anay nga hunahuna-on sa PSL nga kumbinsido lamang sila nga ang tanan inisyatibo sa Ginoo. Ang katapusang pangutana ni Fr. Ritsche, “Gi-unsa nato pagpuyo ang kalipay nga dala sa Ebanghelyo?

Gihuman ang maong recollection pinaagi sa Santos nga Misa nga gipangulohan sab niya. (Naldz Villodres | SMPR Parish SoCCom, Hulagway kuha ni Teody Lim, GKK SoCCom, SIL Juliville)