Lay orgs, pastoral agencies nanulod sa DXGN

Uban pang grupo sa simbahan, imbitado

Onse sa kapin 40 nga miyembro sa Archdiocesan Council of the Lay Apostolates and Integrated Movements kon ACLAIM ang regular nang nagalingkod sa mga programa sa DXGN.

Kini ang mga ASC-Charismatic Renewal Movement sa Archdiocese sa Davao, Bukas Loob sa Diyos Covenant Community, The Loved Flock Community, ug Couples for Christ. Niapil usab ang Marian organizations sama sa Confraternity of Perpetual Rosary Movement (CPRM), Legion of Mary, Marian Movement of Priests, Our Lady of Fatima Prayer Movement, Holy Family Institute, Latin Mass Society, ug uban.

Dako ang impact sa radio program aron mapalapnag ang debosyon sa Diosnong Kaluoy kon Divine Mercy.

Si Sis. Elsa Gutierrez, deboto, miingon nga sa ilang panagtapok bag-uhay pa lamang, upat na ang nakatambong tungod sa ilang pagdungog sa programa sa DXGN.

Sa pikas bahin, 9 sa 14 nga pastoral agencies, apil ang social communications ang libreng nagasibya sa Spirit FM sa kasamtangan. Kini human nga nasabutan nga mutabang ang mga parokya sa pagbayad sa kuryente sulod sa 1 ka tuig hangtud karong Hulyo ubos sa kondisyon nga dili na sila paninglan sa airtime. Sila mao ang musunod: Archdiocesan Liturgical Center, Bible Apostolate of Davao, Social Action Center, Caritas Davao Foundation, Indigenous Peoples Apostolate (IPA), Davao Archdiocesan Youth Coordinating Apostolate, Family and Life Apostolate, Archdiocesan Commission for Prison Welfare, ug John XXIII Catechetical Center. Nagaprograma usab ang pastoral office kauban si Bp. George B. Rimando ug Vicky Anghag. Titulo niini mao, “GKK: Gasa sa Diyos sa Dabaw,” kada Sabado sa gabii.

Matud pa ni Susan Genelsa, katekista gikan sa San Alfonso Ma. De Liguori, Mandug, “Nalipay kaayo ko nga nataggan mi ug slot tungod kay dili lang sa GKK namo napadayag ang among talento kundili sa tanan-tanan nga naminaw sa DXGN.”

Ang Philippine Catholic Lay Mission aduna usab programa sa Sabado sa buntag. Kini aron mas daghan pa ang maaghat nga musulay sa kinabuhing misyonero.

Nanghinaut ang estasyon sa Katolikong Simbahan nga daghan pa ang manulod nga lay organizations aron nga mas daghan pa ang matabangan. @dcherald