Kapistahan ni San Jose, gisaulog sa parokya sa Tagakpan

Gisaulog sa San Francisco de Asis Parish-Tagakpan ang kapistahan sa pagka-bana ni San Jose niadtong Marso 20, 5:30 sa hapon. Ang maong kapistahan gipangulohan sa Oblates of Saint Joseph priests nga sila Fr. Peter Fanculbila, kura paroko, ug Fr. Jolito Marterior, assistant parish priest. Giduyugan usab kini sa Caballeros de San Jose ug mga parokyano sa San Francisco de Asis Parish.

Nagsugod ang selebrasyon pinaagi sa usa ka prusisyon diin nagkatigum ang tanang katawhan aron pasidunggan ang imahe ni San Jose. Dayon gisunod ang Santos nga Misa nga gipangulohan ni Fr. Peter ug Fr. Lito, dinuyugan ni Rev. Elly Capuno.

Sa homiliya, gihatagan ug emphasis ni Fr. Lito ang pagkabana ni San Jose kay Maria. Matud pa niya, angayan lamang nga atong himoong sumbanan si San Jose sa atong kristohanong pagpuyo — nga sama ni San Jose, magmasinugtanon kita sa kabubut-on sa Diyos, kay kini magdala kanato sa dalan sa katarongan.

Gitapos ni Fr. Peter ang iyang homiliya pinaagi sa paghatag ug pinulongan nga latin: Ite Ad Ioseph “Go to Saint Joseph” aron giyahan kita sa atong Kristohanong Pagtoo.

Pagkatapos sa Santos nga Misa, nangadto ang mga tao sa Marello Hall para sa gamay nga salu-salo. (Jeffren P. Miguel, SFDA SoCCom)