Kaparian nagsaulog sa ilahang priestly anniversaries

MATI CITY – Tulo ka mga pari sa diyosesis sa Mati ang nagsaulog sa nagkadaiyang mga kasumaran sa pagkapari. Una si Apostolic Administrator Msgr. Edito “Ed” S. Baño, kinsa nagsaulog sa ika-31 ka tuig sa iyang pagkapari niadtong Abril 2, 2017. Sunod sila si Fr. Roberto “Bert” S. Ombon, kura paroko sa Sto. Niño parish, Kinablangan, Baganga, Davao Oriental (DavOr), ug Fr. Roland F. Sayman, parochial vicar sa San Ignacio de Loyola Parish sa Luzon, Gov. Generoso, DavOr, sa ilang ika-25 ka tuig niadtong Abril 7, 2017.

Sa bahin ni Msgr. Ed, si Bishop Emeritus of Mati Patricio H. Alo, DD, maoy nag-preside sa 5:30 sa hapon nga Thanksgiving Mass sa San Nicolas de Tolentino Parish Cathedral.

Human sa Eukaristikanhong kasaulogan, ang mga nagtimbaya ug nakigduyog sa selebrasyon nagtapok sa 5th floor sa Mati Cathedral alang sa usa ka panihapon nga giandam sa Parish Consultative Council (PCC) pinangulohan ni Chairman Brod Carlos Millan. Ang panagtapok nahimo usab usa ka mini-concert party. Pipila ka mga Diocesan Clergy of Mati (DCM) ug mga paring relihiyoso sa mga ordeng Salesiano ni Don Bosco (SDB), Agostino (OSA) ug Ministers of the Infirm (MI) ang miawit isip serenata kang Fr. Ed, samtang niapil sa sayawan ang kamadrehan ug mga layko. Namatikdan ang kahimuot ni Bishop Pat sa iyang pagsaksi sa sayawan sa tanan duyog sa pag-awit ni Fr. Ed sa tugtog sa banda. Ispisyal ang solo nga pasundayag ni Fr. Mario C. Jimenez, ang bag-ong parochial vicar sa Cathedral, nga nag “sayawit” sa iyang bersyon sa kantang “Si Filemon…Bahay Kubo.”

Gipadayag usab sa mga piniling kamadrihan ug layko ang ilahang mga mensahe sa pagpasalamat sa Dios atol sa mga gasa nga Iyang gihatag kang Fr. Ed sulod sa iyang 31 ka tuig nga “makugihon kaayong pag-alagad sa katawhan sa Diyos ug pagpadayon sa misyon sa ebanghelisasyon alang sa kaluwasan sa mga kristohanong anak sa Diyos, labi na sa mga pagbansay sa healing ug exorcism”.

Isip tubag, si Fr. Ed mipunting sa iyang tulo ka sekreto sa pagkinabuhing matarong: (1) Prayer, (2) Maintain a Good Health, (3) Remain a Priest Forever.

Kahinumduman usab nga si Fr. Ed ang kasamtangang nangulo sa mga panagtigum sa Davao, Digos, Tagum, Mati (DADITAMA) atol sa turno karong tuiga sa paghost sa Mati diocese.

(L-R) Fr. Bert Ombon, Fr. Nestor Morata, Fr. Ed Baño, an RVM sister, Fr. Roland Sayman (aside)

Sa simbahan sa San Salvador del Mundo sa Caraga, gisaulog sa alas 9:00 sa buntag nga misa ang ika-25 kon silver sacerdotal anniversary nila Fr. Bert A. Ombon ug Fr. Roland F. Sayman, nga pareho taga-Caraga, DavOr, sa pagpanguna ni Digos Bishop Guillermo V. Afable, inubanan ni Apostolic Administrator Fr. Ed S. Baño, ug mga 10 ka pari gikan sa Mati, Digos ug Davao.

Si Fr. Bert ang militok sa mga pulong sa pasalamat sa tanan, ug sa Ginoo labaw sa tanan sa dakong panalangin sa ilang pag-abot sa 25 ka tuig sa pagkapari taliwala sa mga kalisdanan, kalamidad, ug bug-at nga pagsulay.

Giila usab niya ang dakong kabahin ni Bishop Alo sa ordenasyon nilang duha ni Fr. Roland. Dugang pa niya: “My heartfrelt gratitude to Bishop Alo for his fatherly and exemplary shepherding of the priests in the diocese of Mati, that made me survive and has inspired me all throughout those years. I promise to myself to continue my service to the Diocese of Mati and my prayers for all the people I have worked for before, my family, relatives, lay faithful of my parish and all the clergy of the diocese of Mati. You are my dear inspiration. Indeed God is good, God is great!” (with Linda Mahumot & Fr. Bert Ombon)