Bible Quiz sa Radyo Nagapadayon

MATI CITY — Gikalipay sa Bible Apostolate (BA) sa Diyosesis sa Mati ang pagpadayon sa pipila ka mga kalihokan kalabot sa selebrasyon sa Semana/Bulan sa Bibliya sa Enero, labi na ang partisipasyon sa mga tigpaminaw sa radyo sa mga Bible Trivia-Quiz on the Air matag Mierkoles, alas 4:00-5:00 sa hapon. Segun ni Diocesan BA Coordinator Sr. Belen R. Suemith, LGC, nadugangan na hinoon ang ilang mga tigpaminaw gikan sa ubang mga lungsod sama sa Manay ug Tarragona. Gikalipay usab niya, matud pa, ang pag-order og mga bibliya gikan sa mga interesadong indibidwal nga gusto usab nga mahatagan og Bibliya ang mga banay o pundok nga nagkulang sa maong balaang pulong sa Diyos.

Labot niini, gipahinumduman ni Sr. Belen ang katawhan nga ang pagpang-apodapod sa bibliya sa mga banay maoy kabahin sa “May They Be One” (MTBO) Bible Campaign nga gilusad niadtong Septiyembre 2008 sa hiniusang damgo sa Episcopal Commission for the Biblical Apostolate of the Catholic Bishops’ Conference of the Philippines (ECBA-CBCP) ug sa Philippine Bible Society (PBS), lakip ubang mga Kristiyanong simbahan ug mga laykong organisasyon nga nahilambigit sa apostolado sa Bibliya.

Sa samang bahin, mapasalamaton usab ang diocesan Bible coordinator sa mga boluntaryong midonar og mga bibliya para sa mga kabus nga pamllya samtang gidasig usab niya ang mga pamilya sa pagbansay sa debosyon sa pag-ampo, sama sa pagpahigayon og oras sa pag-ampo sa rosaryo ug sa pagbasa ug pag-inambitay sa Pulong sa Diyos, labi na ang matag domingo nga ebanghelyo—ang Lectio Divina. Kini, segun pa sa madre, ang nahilakip sa nagpadayon nga formation seminars alang sa mga Lectors sa managlahing mga parokya, kung diin gitutukan gihapon ang pagpalig-on sa pagtuo sa pamilya, ang “domestic church”.