Bag-ong Planta sa Koryente Itukod sa Siyudad sa Mati

MATI CITY — Aron mahingusgan ang kalidad sa serbisyo sa Davao Oriental Electric Cooperative (DORECO) ug masumpo ang kakulangan sa koryente sa siyudad, usa ka 5-megawatt power plant ang pagatukoron karong Abril 2017.

Pinaagi sa competitive bidding, ang planta pagatukoron sa Total Power, Inc. (TPI) sa usa ka-ektarya ka luna sa National Highway in Crossing Libudon, Brgy. Dawan, ug mo-operate human sa usa ka tuig gikan sa petsa sa construction.

Sumala ni DORECO Chief Executive Officer (CEO) Engr. Gregory A. Dukil pagagamiton sa mga contractors ang tulo ka bag-ong makina nga ginama sa Belgium nga matag-usa mo-produce og 1.8 megawatts.

Ang DORECO mobayad sa TPI og 13 sentimos sa matag kilowatt hour sulod sa 15 ka tuig ug unya mapanag-iyahan na ang planta segun sa build-operate-transfer-scheme. Gilantaw nga masulbad sa planta ang mga ‘unscheduled power interruptions’ sa pagsilbe niini isip back-up sa mga higayon sa ‘emergency power outages’.

Dugang gipasabut ni Dukil nga mas barato ang diesel power plant ug mas praktikal ug masaligan usab kini nga tinubdan sa enerhiya kon itandi sa “renewable energy” nga dako ang gastos sa pagpalambo. Kini usab, matud pa niya, mopagaan sa gipas-ang pinansyal sa mga konsumante tungod kay dili na sila mobayad para sa “system loss” ug eksakto ug dili ubos ra ang boltahe tungod kay “low voltage destroys several kinds of equipment.”

Gitataw sa CEO nga tungod sa nag-anam ka dako nga populasyon sa siyudad sa Mati nga dungan sa tibuok probinsya nagsinati sa mga buhat sa “industrialization” dako gayud ang ikahatag sa plantang diesel sa gikinahanglang supply sa koryente.

Giseguro usab ni Dukil nga ang gi-skedyul nga construction dili mohatag og peligro sa tawhanong kahimsugan tungod sa mga filter devices batok carbon dioxide, gawas sa una nang gipananom nga kahuyan sa palibot sa lugar niadto pang Agosto sa miaging tuig. (with Riza Golez)