Ang Krus ug ang Kwaresma

“Kay ang mensahe ni Kristo sa krus binuang alang kadtong wala maluwas, apan kanatong nangaluwas, gahum kini sa Diyos” (1 Cor. 1:18).

Ang Krus sa panahon sa mga Judeo usa ka paagi sa silot alang sa usa ka kriminal. Makauulaw nga silot diin silotan lamang kadtong mga tawo nga dagku ug sala. Ang atong Ginoo walay sala (1 Pedro 2:22), apan gumikan sa iyang dakung gugma kanato (Juan 3:16) gipaula niya ang iyang dugo isip halad sa Dios alang sa kapasayluan sa atong mga sala (Heb. 9:22). Ang atong Ginoo matuod nga higala ug magbalantay. Ang matuod nga higala andam mutugyan sa iyang kinabuhi (Juan 15:13) tungod sa gugma (Juan 10:11).

Ang kwaresma mao ang tinuig na paghandum sa pagpangandam nato sa umaabot na Mahal na Adlaw (Holy Week) diin ang KRUS nahimong instrumento kun simbolo gikan sa kapukanan ngadto sa kadaugan. Ang Krus dili gayud mabulag sa atong pagtuo. Sukad pa kaniadto hangtud karon, ang Matuod nga Simbahan pinaagi sa lamdag sa Espiritu Santo (Juan 14:16,26) kanunay nagtamud sa Krus sa atong Ginoo isip gahum ug simbolo sa atong pagtuo. Kay matud pa ni Apostol San Juan, “ug gidaog nato ang kalibotan pinaagi sa atong pagtuo.”(1 Juan 5:4). (Bro. Ryan R. Mejillano / CFD / LMS)

Paminawa matag martes 8-9pm ang programa Sub Umbra Petri (Ubos sa landong ni Pedro) sa Giya sa Pagtuo, DXGN 89.9 Spirit FM. Ave Maria!