3 ka Seminarista migradwar sa Seminaryo

MATI CITY — Malipayon ang Diyosesis sa Mati sa pag-gradwar sa tulo ka mga bag-ong Theologians gikan sa St. Francis Regional Seminary (REMASE) sa dakbayan sa Davao. Ang tulo mao sila si: Alfie B. Alimbon gikan sa Caraga, Eric L. Bangcot ug Raphy M. Armasa gikan sa Luzon, Sigaboy, Davao Oriental.

Gipahigayon ang graduation ceremony human sa Baccalaureate Mass sa Remase, kauban ang laing 18 ka mga seminarista gikan sa managlahing diyosesis sa Mindanao ug ubang mga relihiyosong kongregasyon, niadtong Marso 20, 2017.

Si Davao Archbishop Most Rev. Romulo G. Valles, D.D. ang nangulo sa Santos nga Misa sa seminary chapel.

Si Digos Bishop Guillermo V. Afable miluwat sa homiliya nga dili matapos ang pormasyon sa mga seminarista sa ilahang paghawa, kondili magpadayon kini bisan human sa ilang parianong ordinasyon.

Ang pinasidunggang dinapit ug ug kanhi seminary professor ug kasamtangang kura paroko sa San Pedro Claver parish sa Tarragona, Fr. Edilberto “Loloy” R. Mahinay ang nagpahinumdum sa mga graduates sa kamahinungdanon sa pag-ampo ug sa pakig-istorya sa Ginoo sa Gugma sa Santisimo Sakramento.

“Do not forget to spend time with the Lord in the Blessed Sacrament and to always be in love with the Lord,” maoy amahanong tambag sa pari, samtang gidasig niya ang tanan sa pagmintinar og yano ug dili maluho nga istilo sa kinabuhi kauban sa simpleng katawhan.

“Plant this in your heart: the parishioners you will be serving are simple people. They are not complicated. They love their priests simply. This is what people want to see in their priests,” dugang gipasabot ni Fr. Loloy.

Mapasalamaton ang tulo ka post-theologians nga nanghinaut makapadayon unya sa sunod nga lakang sa ilang diyakonato, kung takus man sila atubangan sa Diyos. Milungtad og mga napulo (10) ka tuig ang ilang seminary formation—gikan sa pre-college hangtud theology. Masaligon gihapon sila sa grasya sa Diyos nga maoy mitawag kanila sa ilang misyon sa kinabuhi, sumala ni Seminarian Raphy, kinsa usab manghod ni kanhi REMASE graduate Fr. Rey Armasa, principal sa Maryknoll School of Lambajon. Ang Apostolic Administrator sa Mati diocese, Fr. Edito S. Baño ang mitug-an sa media nga moagi ang tulo og programa nga modeterminar sa ilang ordenasyon sa diyakonato, pinasikad usab sa rekomendasyon gikan sa mga hingtundan. Katapusan mao na ang ordenasyon sa pagkapari.