Sunog sa Agdao, nakapahiusa sa katilingban

Ang nahiagi sa R. Castillo St. sukad niadtong niaging semana tingali nakalingi ug basin nakalingi pag-usab niining gamay nga kapilya sa Sto. Niño nga anaa sa daplin sa dalan. Adlaw ug gabii, sukad niadtong Pebrero 19, puno ang kapilya sa mga tawo ug mga butang.

Sa mga taga Agdao, ilabi na sa Parokya sa San Antonio de Padua, dako kini nga panghitabo tungod kay 56 ka pamilya ug 17 niini mga miyembro sa Sto. Niño GKK, Zone 8 ang nahiagom sa kapait sa resulta sa sunog nga nahitabo niadtong kaadlawon sa Pebrero 19.

Kini tungod sa faulty electrical wiring nga gikan sa usa ka internet station. Napulo ka pamilya ang nahimutang sa kapilya sukad pa niadtong adlaw sa sunog. Sila ang walay masak-an nga pamilya o paryente. Niadtong buntaga, dayon nga milihok ang mga GSL sa Sto. Niño GKK. Gipahiluna nila ang mga pamilya ug gipakaon. Ang ilang gigasto gikan sa panudlanan sa GKK.

Ang ubang GKK sa sona 8 mihatag usab og pinansyal nga tabang nga mikabat sa P 8,300. Niadtong Pebrero 25, mipadayon sila sa Kasaulogan sa Pulong ug dinhi niapil ang napulo ka pamilya nga nagsaka sa kapilya.

Sumala sa ilang PSK nahimong mabination ang mga pamilya. Wala man madungog gikan sa ilang baba, apan nabati gikan kanila ang pag-abot sa mensahe sa Ebanghelyo – ang pagpahinumdom sa matag usa sa pagpili sa angayang buhaton isip anak sa Dios nga nagatuo Kaniya.

Sa laing bahin, mihatag na og hinabang ang Parokya sa San Antonio de Padua, ang opisina sa Vice-Mayor sa Davao, ug ang DSWD pinaagi sa CSSDO. (Elena Corazon Mozo | SAP SoCCom)