Sakripisyo ko, benepisyo mo

San Antonio Parish, Agdao – Ang Simbahan sa tibuok Pilipinas nagasaulog karon sa 40 ka adlaw kon panahon sa Kwaresma, ang panahon sa Diosnong kalooy. Ang katawhan sa Dios gitawag sa pag-ampo, pagpuasa, ug paghimo sa mga buhat sa kalooy aron makaambit nga matinud-anon sa pagpasakit ug kamatayon ni Kristo ug maandam sa pagsaulog sa Iyang mahimayaong pagkabanhaw.

Ang pagsaulog sa “Tuig sa Parokya: Komunyon sa mga Katilingban” karong tuiga magdala sa tibuok Simbahan sa usa ka makahuluganong pagsaulog sa panahon sa Kwaresma ug pagbuhat sa Alay Kapwa.

Duyog ang tibuok Simbahan sa nasud Pilipinas gilunsad niadtong Marso 5 ang Alay Kapwa, sa sulod sa Santos nga Misa sa Parokya.

Gibendisyonan ni Padre Toto España, kura paroko, ang mga gamit sa Alay Kapwa nga mao ang sticker nga ipilit sa plastic nga botelya, ang basahon, ug ang stampita. Iya usab giapil ang mga Pangulo sa Alagad (PSA) sa mga GKK nga maoy manguna niining buluhaton.

Gipahinumduman sila ug ang tanang parokyano sa pag-apil sa maong buluhaton ubos sa pagtuo nga ang ilang sakripisyo nga gihimo mahimong benepisyo alang sa uban.

Ang Alay Kapwa matud niya higayon aron ang tawo makahimo sa pagsalikway sa iyang kaugalingon aron makahatag og kaayohan sa uban.

Giawhag ni Padre Toto ang tanan nga misimba atong higayona sa pagdawat sa mga GSL sa ilang mga panimalay alang sa pag-ampo, pagpaminaw sa mensahe sa Ginoo, ug paghimo sa sakripisyo sa paghulog sa iyang kinasingkasing nga donasyon diha sa botelya sa Alay Kapwa. (Elena Corazon Mozo | SAP SoCCom)