PSK Recollection

St. Mary of the Perpetual Rosary Parish – Malampuson nga gipahigayon ang tinuig nga Recollection sa mga Pangulo sa Katilingban (PSK) sa Parokya sa Buhangin. Adunay 51 ka mga PSK nga nitambong niadtong Pebrero 26 sa Our Mother of Perpetual Help GKK, Panorama Village, Buhangin, Davao City.

Ang unang topic gihatag ni Msgr. Edgar Labagala. Kini mahitungod sa “Personhood, Commitment and Service”. Matud pa niya nga ang tao maoy nagasulti; buot ipasabot nga gamiton sa tao ang iyang pulong aron mapadangat niya sa iyang isigkatawo kung unsa ang iyang angay ipasabot. Isip usa ka PSK dapat klaro ang ipadangat ngadto sa katilingban aron adunay pagsinabtanay ug dili usab puwede nga ang tao mag-inusara lamang.

“The human person does not achieve his perfection in isolation from others; individualism ultimately leads to disintegration or destruction,” dugang pa ni Msgr. Labagala.

Dinhi gipasabot ug gipa-hinumduman nga ang mga PSK wala mag-inusara ug gikinahanglan niya ang iyang katilingban aron makab-ot ang kalamboan ug kalampusan sa GKK.

Nadugangan ang kahibalo sa mga PSK sa ikaduhang topic nga mao ang “Year of the Parish: Parochial and Ecclesiastical”. Tungod kay gisaulog sa Simbahan ang Tuig sa Parokya karon, gipasabot ni Fr. Jon Saguban, TOR nga bisan pa nagkalain-lain ang atong mga katilingban, kinahanglan nga maghiusa ngadto sa kinabuhi ug misyon sa Parokya. Ang Panaghiusa, ang Pagkasakop, ug ang Pagpanginlabot maoy angay masinati usab sa mga sakop niini.

Kinauyokan sa maong recollection mao ang pagsaulog sa Santos nga Misa. Maingon nga malampuson ang maong recollection tungod kay daghang nakat-onan ang mga PSK mahitungod sa ilang pagserbisyo sa katilingban ug ngadto sa Parokya isip usa sa Misyon. (Edith C. Ibañez, PSK | Hermie Mapute, Parish SoCCom | Photo: Edith Ibañez)