‘Parish: Family of Families’

Ang Family and Life Apostolate (FLA) Core Group ug PSKB sa St. Joseph the Worker Parish gitapos ang Pro-life Month niadtong Pebrero 26 subay sa tema nga gibasehan sa duha ka mga kalihukan mao ang “Parish: Family of Families”.

Gihimo ang On-the-Spot Poster Making Contest alang sa mga batan-on nga nag-edad og 13–35 ang panuigon. May 8 ka partisipante nga nagrepresentar sa ilang mga zona. Ang nakadawat sa unang ganti mao si Allensis Cuajao nga taga sona 6, ang ika duha nga ganti si Krys Joie Salado nga taga sona 4, ug ang ikatulo mao si Lester Palomo nga taga sona 5. May lima usab ka mga partisipante nga nakadawat sa consolation prizes.

Gipahigayon ang Zonal Speech Choir Competition pagkahapon diin adunay 10-15 ka mga partisipante nga gikan sa GKKs ang nagbangga sa ilang kahawod nga mohatag sa mensahe sa ilang pagdapig ug pag-atiman sa kinabuhi sa tawo. Gihatagan sila og tulo ngadto sa upat ka minuto lamang sa pagpasundayag sa ilang contest piece nga sila usab ang naghimo. Nakadawat sa unang ganti mao ang sona 1 gikan sa GKK Summer Hills, MOPH sa Lanang, Sta. Cruz sa Fortune Homes ug sa GKK Queen of Peace sa Nova Tierra nga gipangulohan nila Erecka Suner ug Eduardo Andoy. Ang ikaduhang ganti nakuha sa taga sona 5 ug ang ikatulo gikan sa sona 4.

Matud pa sa usa sa mga hurado nga si Reta Mariano, ang kalihukan nindot, makahuloganon ug makalingaw kaayo.

Nagmabungahon ang gisaulog nga pagtapos sa bulan sa Pro-life tungod kay ang matag usa nga nanambong dili lang aron sa pagsuporta sa ilang contestant, apan nagpadayag usab sa ilang paghigugma, pag-atiman sa kinabuhi, pagpanalipod sa kinabuhi niini. (Amie Desquitado, SJWP SoCCom)