Pangulo sa Simbahan nanawagan nga ablihan ang Peace Talks

Mga Dabawenyong gikan sa nagkalain-laing organisasyon, simbahan ug tulunghaan ang misalmot sa gipahigayong Walk for Peace, di pa lamang dugay.

Ang maong panagtigom gitambungan sa mga estudyante, magtutudlo, relihiyoso, layko, mga pangulo ug miyembro sa Katolikong simbahan ug ubang relihiyon. Makita sa maong okasyon ang panaghiusa sa mga Kristiyano, Muslim ug Lumad nga nanawagan sa kasamtangang administrasyon nga ablihan pag-usab ang pakighinabi alang sa kalinaw tali sa gobyerno ug mga rebelde.

Sumala kang Atty. Romeo Cabarde, chairperson sa University Community Engagement Advocacy Council (USEAC) sa Ateneo de Davao University, ang Walk for Peace usa lamang sa mga gihimong lakang sa komunidad aron ipasibaw sa hingtungdan ang mulo sa katawhan sa pagkab-ot sa kalinaw sa nasud.

Singgit sa mga misalmot sa maong okasyon nga dili giyera ang gikihanglan sa katawhan kon dili trabaho, matuod nga serbisyo, hustisya ug kalinaw aron muusbaw ang nasud Pilipinas.

Ang Walk for Peace gisugdan sa Freedom Park sa Roxas Avenue padulong sa Ponciano Street ug nisubay sa dalang C.M. Recto, ug balik sa Freedom Park. Nagpahigayon ug programa ang mga nangulo sa aktibidad paghuman sa martsa sama sa simpleng konsyerto nga nagpasabot sa kaimportante sa kalinaw isip usa ka nasud.

Naghinaot ang mga Dabawenyo nga pinaagi sa Walk for Peace makahuna-huna ang gobyerno sa subling pag-abli sa Peace Talks aron maangkon na sa katawhan ang dugay nang gipangandoy nga kalinaw. (Flor Arellano-Deloria)