Mati nagpahigayon ug aktibidad sa kapistahan ni San Jose

Atol sa pagsaulog sa kasumaran sa pagkatukod sa duha ka sibyahanang katoliko sa diyosesis sa Mati—DXHM (Heart of Mary)-AM, 549 khz, ug DXDV (Dei Verbum)-Spirit FM, 97.5 mhz, ang kasaulogan sa Santos nga Misa gisponsoran sa mga istasyon sa simbahan sa Divine Mercy.

MINUS ONE GRAND FINALS

Human niini, gipahigayon ang “Take One on the Air” (minus-one singing competition) championship alang sa monthly finalists – bulilit and adult divisions.

Gikan sa managlahing mga barangay sa siyudad sa Mati ug sa probinsiya sa Compostela Valley, midagsa ang mga tawo aron musaksi. Kahinumduman nga sa mga sinemanang kompetisyon, adunay misulay usab gikan sa Davao City ug Surigao City nga miawit pinaagi lang sa cell phone, samtang gipaminawan ang duyog sa radyo.

Emcee ang Station Finance Officer nga si Edith B. Enciso kinsa mianunsyo sa mga winner, nga pulos nanukad sa siyudad sa Mati.

Sa Bulilit division: 2nd runner up- Valerie Catulong (Upper Tagawisan Brgy. Badas), 1st runner up- Brazil Cuevas (Lower Salazar Brgy. Central), ug grand champion- Daniela Marie Samson (Mapantad, Brgy. Sainz).

Sa Adult category: 2nd runner up- Titing Catulong (Upper Tagawisan Brgy. Badas), 1st runner up – Jossie Dacalos (Interco Brgy. Matiao), ug grand champion- Elena Momo (Magsaysay, Brgy. Central). Gitunol ngadto sa mga mananaog ang premyong cash ug uban pang in-kind gifts gikan sa sponsors. 

Nadungog ug nasaksihan ang maong programa sa radyo ug sa Katolikong telebisyon, ang Trinity Cable TV (TCTV).  Misunod ang fellowship lunch alang sa media staff, volunteer DJs ug guests.

OUTREACH PROGRAM

Ang outreach sa Sitio Taganilao Brgy. Tamisan, Mati City gipahigayon niadtong Marso 25. Mapasalamaton ang mga lumilihok sa pagpanguna ni Santos “Bantex” Mamelic sa mga donasyon nga nalikom alang sa pagpalit og pagkaon ug school supplies alang sa gatusan nga kabus nga mga bata.

Ang duha ka istasyon sakop sa Catholic Media Network (CMN) nga kanhi nailhan sa ngalan nga Philippine Federation of Catholic Broadcasters (PFCB) sa tibuok nasud.  Ika-26 ka tuig na alang sa DXHM ug ika-8 sa popular kaayong Spirit FM sa tibuok siyudad sa Mati ug haduol nga mga lungsod.

CSJ FIESTA UG KASUMARAN SA PAGKAPARI

Ang mga kamadrehan sa Catechists of St. Joseph (CSJ) nagdapit sa katawhan labi sa mga nagapangalagad sa Clergy House Compound, didto sa ilang panimalay sa Milagrosa Formation Center, Pahamutang, Matiao, Mati City, atol sa kapistahan ni San Jose.

Si Bishop Emeritus sa Mati Patricio “Pat” H. Alo ang nanguna sa kasaulogan sa Eukaristiya, dayon gisundan sa paniudto alang sa mga bisita ug ilang kapamilya gikan sa Cateel, San Ignacio, ug Lupon. Sa iyang wali, gihulagway ni Bp. Pat si San Jose nga matinumanon nga sulundon sa kabubut-on sa Diyos, sama ni Maria nga abli ang “dalunggan sa kasingkasing” sa mga hunghung sa Espiritu Santo.

Sa laing bahin, niadtong Marso 14, gisaulog ni Bp. Pat ang ika-53 nga kasumaran sa iyang ordinasyon sa pagkapari kanhi didto sa Roma, Italya. Usa ka simple nga selebrasyon ang giandam alang kaniya sa diyosesis sa Mati ug sa TCTV pinaagi sa iyang paghalad sa Thanksgiving Mass (concelebrated) sa kapilya sa iyang retirement home sa Madang, Mati City, ug paniudto nga gitambongan sa mga pari ug madre, lakip ang mga Contemplative Carmelite (OCD) sisters sa Mount Carmel, pinangunahan ni Mother Maria Lourdes of the Immaculate Conception, OCD. Mapaubsanong nagpasalamat si Bp. Pat sa tanang mga grasya ug panalangin sa Diyos nga maoy nagahatag kaniya og kusog sa lawas ug kalag, samtang giduot niya ang kamahinungdanon sa “kamatuoran ang tinubdan sa kagawasan” (Jn 8:32), taliwala sa tanang mga panghitabo sa kaugalingon, sa pamilya, ug sa katilingban.