Kahiusahan sa mga deboto, kadasig sa parokya

St. Joseph Parish, Sasa — Nagkahiusa ang mga workers of St. Joseph sa pagpahigayon sa ikalimang Symposium on the Life of St. Joseph niadtong Marso 5 sa 3rd floor sa Pastoral Building sa Parokya.

Kini giapilan sa 80 ka debotante ni San Jose ilabina niadtong mga GKK nga ang ilang patron mao si San Jose. Ang maong kalihukan giniyahan sa tema, “Kaambitan ug Kahiusahan sa mga Katilingban uban ni Sr. San Jose.”

Imbitado aron magpaambit si Msgr. Bonifacio L. Burlaza. Gihimo ang workshop sa lima ka pundok aron sa pagtuki kung unsang pamaagi aron magkahiusa ang katilingban uban ni Sr. San Jose.

Nagpaambit ang tanan sa ilang mapadayonong pagpanawduaw sa Imahen ni Sr. San Jose sa matag balay ug gitinguha ang pag-organisa sa pundok banay sa ilang katilingban.

Matud pa ni Ericka Suñer sa iyang report nga padayunon ang pagnobena kang Sr. San Jose kay kini ang numero unong hinagiban aron magkahiusa ang katilingban.

Si Msgr. Boni Burlaza miingon nga unta ang mga GKK Servant Leaders susama ni San Jose, mutaas ang pagsalig sa Dios ug unsa man ang gihimo niya sa matag adlaw , buhaton alang sa iyang ikahimuot. Gihagit sab ang matag GKK sa pag-angkon og usa ka birtud ni San Jose sulod sa usa ka tuig nga maoy paningkamutan nga maangkon usab diha sa kinabuhi. “Ug nagkalawom ang inyong pagkaila ni San Jose , makadani usab kamo og mga tawo aron sa pagdebosyon ni Sr. San Jose, inyong madala duol kang Hesus aron kitang tanan maluwas,” sumala pa ni Msgr. Burlaza.

Si Fr Diony Tabiliran nag ingon usab nga kining panagtigum maoy makapasuod sa matag usa, ug nagdasig sa umaabot nga pagpangandam sa kapistahan sa GKK ug sa parokya, nga anaa unta ang kakugi sa pagtambong sa ipahigayon nga nobena.

Ang regular nga pagnobena alang kang San Jose ug Santos nga Misa ginapahigayon matag Huwebes, sa 5:30 sa buntag ug 4:30 sa hapon. (Amie Desquitado | SJWP SoCCom)