GKK Registry Orientation nahimong higayon sa pagkumustahay

Ang pamilya mahibalo sa mga panginahanglan sa matag miyembro niini. Mahibalo ang usa’g-usa sa ilang kahimtang; kung unsa ang anaa o wala. Matag karon ug unya magpangitaay ug magkumustahay sila.

Ang parokya usa ka panaghiusa sa mga Kristohanong pamilya. Maong ang parokya maningkamot sa pagpakisayod sa kahimtang sa mga pamilya sa GKK.

Karon, adunay Book of Registry nga ginapa fill up diha sa mga GKK aron makita ang kadaghanon sa Katolikong pamilya, ang ilang kahimtang kabahin sa mga Sakramento nga ilang nadawat gikan sa Simbahan, ug aron makahatag sa mga impormasyon alang sa umaabot nga panginahanglan.

Diha sa parokya sa San Antonio de Padua – Agdao gitapok una ni Padre Toto España, kura paroko, ang mga GKK Servant Leaders, GKK Soccom ug ang magsulat sa libro kung dili ang secretary ang maghimo niini, aron ipaklaro kanila ang hustong pamaagi sa pagbutang sa impormasyon. Kini gihimo sa zonal orientation ug workshop niadtong Pebrero. Human, gipadala kanila ang GKK Registry.

Niadtong mga higayona gihimo usab ni Padre Toto ang pagpangumusta kanila ilabi na mahitungod sa mga kalisdanan diha sa GKK. Ang GKK Registry Orientation nahimong usa na usab ka higayon aron magkumustahanay ang tanan, kauban ang amahan ug inahan sa Parokya sa San Antonio de Padua, si Padre Toto España. (Elena Mozo, SAP SoCCom)