DXHM/DXDV tinubdan sa makahuluganong balita

MATI CITY – Sa pagpanguna sa Notre Dame Broadcasting Corporation (NDBC) nga gidumala sa kongregasyon sa Oblates of Mary Immaculate (OMI) nga karon nahimutang sa siyudad sa Cotabato, ang Tingog Mindanao Radio Alliance (TIMRA) padayong nagahatud sa kahanginan ug hamubong taho.

Gikan sa nagkadaiyang 24 ka mga sibyahanan sa radyo sa Mindanao ug sa Kabisay-an, ang pag-inambitay sa “local news reports” nakatabang sa katawhan. Tuyo niini ang kasayuran sa katawhan og pagpalig-on sa panaghiusa sa mga local radio station nga sakop sa Catholic Media Network (CMN).

Ang DXHM-AM/DXDV-FM adunay programa kalabot niini Lunes hangtud Biyernes, alas 5:00-5:30 sa hapon. Dinhi madungog ang live reports gikan sa 20 ka mga sibyahanan sa radyo sa Mindanao (lakip na kining duha ka sibyahanang Katoliko sa siyudad sa Mati) ug 4 ka partner stations sa Kabisay-an (Cebu ug Dumaguete). Tinguha sab sa programa nga madunggan ang tingog sa mga taga Mindanaw, kay kini tinubdan sa matinud-anon nga pagsaysay sa mga panghitabo lokal man o nasyonal.

Kahinumduman nga aktibong miapil ang TIMRA sa miaging piniliay niadtong May0 2016.