Clean and Green Program sa Agdao, tubag sa mensahe ni Pope Francis

“The kingdom of God is already present in our midst, like a seed that is easily overlooked yet silently takes roots. Those to whom the Holy Spirit grants keen vision can see it blossoming. They do not let themselves be robbed of the joy of the kingdom by the weeds that spring up all about.”

Mga pulong kini ni Santo Papa Francisco nga iyang gisulat nga mensahe alang sa ika-51 nga selebrasyon sa World Communications Day karong Mayo.

Kini nga mga pulong nagadala og kompiyansa alang sa katawhan sa tibuok Simbahan aron bisan sa kalisod, kakulba, ug kakuyaw nga masinati karon mabati gihapon nila ang kalipay.
Ang liso sa kaayo padayon gihapon sa pagtubo. Kini gitanom sa mga katawhan nga nagatuo ug nagatuman sa kabubut-on sa Ginoo.

Ang liso sa kaayo gitanom diha sa mga parokya. Ang mga parokyano nga mituo sa Ginoo ang mopatubo niini. Ang mga programa sa parokya maoy mga liso sa kaayo nga gitanom diha sa ilang tugkaran aron dili mahikawan sa kalipay ang ilang katawhan.

Ang parokya sa San Antonio de Padua padayon sa pagpananom niining mga liso – usa ka liso diha sa Clean and Green Program.

Alay Linis diha sa mga GKK ug ang Canal ug Coastal Clean-up nga ginapahigayon sa Parish Youth Apostolate kauban ang mga Pangulo sa Batan-on ang implementasyon sa programa sa Clean and Green.

Diha sa Sto. Niño GKK sa sona 6, ilang gihatagan ang programa og dakong kabug-aton. Adunay penalty nga P 50 pesos ang miyembro nga dili makaapil sa binulan nga pagpanglimpiyo sa palibot. Gidawat nila kini nga maayo ug gani ang uban magpadala og pang- merienda kung sila dili makaabot.

Magpadayon ang paglambo sa parokya kung ang iyang katawhan mogahin og panahon ug uban pang ikatabang bisan sa mga kakulian. (Elena Corazon Mozo)