Batan-on sa parokya ni San Jose giduaw ang mga piniriso

Gitudloan kitang mga Kristiyano sa pag-atiman sa mga tawo nga labing nanginahanglan og tabang. Katong mga tawo nga kasagaran nalimtan na tungod kay ang uban nagtoo nga sila wala nay luna dinha sa atong komunidad.

Ang Saint Joseph the Worker Parish Youth Apostolate sa Parokya ni San Jose ang Mamumuo-Santa Cruz, namisita sa mga kaigsoonang binilanggo niadtong Marso 11, 2017 sa lokal nga presohan sa Santa Cruz, Davao del Sur.

Gihimamat ug gikumusta nila ang 17 ka mga binilanggo. Ila usab sila gihalaran og pag-ampo ug gihatagan og mga gasa nga kasagaran panginahanglan sa tawo matag adlaw.

Kini nga aktibidad nahimong usa usab ka paagi nga nasangyawan ang ubang tawo sa paghatag og bili sa mga kaigsoonan natong nabilanggo, pinaagi sa paghatag nila og mga donasyong material ngadto kanila.

Nanghinaut ang parokya nga managhan pa ang mga grupo o indibidwal nga mohimo usab og mga aktibidad diin tumong mao ang pagtabang sa mga tawong wala kaayoy nagatiman ug nahatagan ug pagtagad dinha sa komunidad. (Vanessa V. Franca | Sta. Cruz)