Batakang Oryentasyon Kabahin sa Kampanya Batok Droga (Part 3)

Batakang Oryentasyon Kabahin sa Kampanya Batok Droga Pinaagi sa: SKP 2 GKK-based Rehabilitation Support Programme

Sagop Kinabuhi Program 2 (SKP 2)

Ang Sagop Kinabuhi Program 2 (SKP 2) mao ang programa nga gilunsad sa Arkidayosis sa Dabaw, pinaagi sa iyang Archdiocesan Social Action Center (ASAC), dinuyogan sa University of Southeastern Philippines (USeP) aron makatampo sa multi-sectoral nga paningkamot nga makatabang nga makabalik ang mga nisurender, tungod sa gubat batok droga sa kagamahanan, ngadto sa sabakan sa ilang matag banay ug katilingban.

• SKP 2 kini tungod kay ang unang SKP ang napahilunang programa sa mga katuigan sa 2003s agi’g tubag sa problema sa mga kabataan nga nagalatagaw sa mga kadalanan nga gitawag og Children in Contact with the Law (CICL) nga nakatoon sa pagyupyop og rugby ug pagpangawat. Gisugdan sa San Antonio de Padua Parish sa Agdao, giduplika kini sa uban pang unom ka mga parokya sa Archdiocese.
• Ang SKP 2 adunay 4 ka mga Intervention Programs pinasikad sa gilatid nga drug rehabilitation framework sa Department of Health (DOH) nga mao ang mosunod:
  1. Administrative Management, Coordination, Documentation Monitoring and Evaluation
     Kabahin kini sa pag-organisa ug pagkoordina aron maseguro ang epektibong pagtinabangay sa mga nagsalmot nga mga ahensiya ug organisasyon; ang hustong pre-intervention VSR profiling & assessment; monitoring sa programa, ebalwasyon ug reporting.
  2. Social Services and Psychosocial Interventions
     • Ang bahin sa programa nga mogahin og mga batakang suportang serbisyo ug kapaninguhaan (resources) ngadto sa mga VSRs ug ilang pamilya; lakip dinhi ang mga psychosocial interventions aron ma-usab ang negatibong batasan sa mga VSRs ug mahimong positibo, produktibo ug madawat sa komunidad diin anaa sila nanimuyo;
     • Giponting usab dinhi ang pagkab-ot sa personal nga paghilum sa mga VSRs; pagduyog sa mga VSRs pinaagi sa case management, makanunayong pagtambag, mga sports ug recreational activities, mga katilingbanong gimbuhaton (sama sa paglimpiyo sa palibot, pagpananum og kahoy, ugbp.) ug pagpalambo sa play and art therapy ug mga kalingawan.
  3. Family, Community, Religious and Spirituality
     • Ang mahinungdanong bahin diin tabangan ang mga VSRs, ilang matag pamilya ug komunidad isip mga aktibong partisipante sa community-based rehabilitation pinaagi sa pagdawat og balik sa ilang mga VSRs ngadto sa ilang sabakan;
     • Tabangan nga molig-on ang ilang espirituhanong kinabuhi aron maka-abaga sa ilang panaw ngadto sa pagpakig-uli ug pagpakighiusa; magpakabuhi nga mas makahuloganon ug adunay tumong nga kinabuhi; ug
     • Panalipdan ang ilang komunidad sa pagsulod og balik samga droga.
  4. Educational and Skills Enhancement, and Livelihood Development
     Ang bahin sa programa aron mahaw-as gikan sa kapit-os ang mga VSRs ug ilang pamilya nga nanginahanglan pinaagi sa pagdugang sa ilang mga kahibalo ug kahanas aron mamahimo silang produktibong membro sa ilang komunidad samtang nagalatas sila ngadto sa ilang hingpit nga pag-ayo.