3 ka Hinagiban sa Kwaresma

Ang kwaresma usa ka panahon nga diin kita gihagit sa Dios alang sa usa ka giyera kun panag away – panag away batok sa yawa, sa unod ug sa kalibutan. Aron makab-ut ang tinguha sa Dios, ang Inahang Simbahan (Katoliko) nga maoy haligi ug sukaranan sa tanang kamatuoran (1 Tim. 3:15) nanudlo unsaon pagbaton aron magmadaugon kita sa maong away.

Sa dinhi pa ang atong Ginoo sa kalibutan, iyang gitudlo ang mga angay buhaton aron mabuntog ang mga kaaway. Sa San Mateo 6:3 atong mabasa ang pagtulon-an mahitungod sa buhat sa kaluoy, “Kon pananglit motabang ka sa usa ka tawong kabos, tabangi siya sa paagi nga bisan gani ang labing suod kanimo dili masayod niini.” Lain pa, sa San Mateo 6:9-13 mabasa usab nato ang kamahinungdanon sa pag-ampo (Amahan Namo), “Ayaw kami itugyan sa pagsulay; luwasa hinuon kami gikan sa daotan. Ang pagtulon-an mahitungod sa pagpuasa nagsunod sa San Mateo 6:16-18 na buhaton sa ligdong na paagi. Kining tulo ka mga armadora maoy maghatud kanato sa kadaugan uban sa atong Ginoo sa pag abot sa fiesta sa pagkabanhaw – bahandi nga dili mataya (San Mateo 6:19-21).

* * * * * *

Paminawa matag Martes, 8-9 PM ang programa “Sub Umbra Petri” (Ubos sa landong ni Pedro) sa Giya sa Pagtuo, DXGN 89.9 Spirit FM. Ave Maria! (Bro. Ryan R. Mejillano | CFD,LMSD)