Simbahan ug probinsya naglusad sa MASA-MASID

Ang Diyosesis sa Mati nakiglambigit sa Probinsiya sa Davao Oriental (DavOr) sa programang Mamamayang Ayaw Sa Anomalya, Mamamayang Ayaw Sa Ilegal na Droga (MASA-MASID) nga gilusad sa Provincial Dept. of Interior and Local Government sa miaging bulan sa Enero.

Kini ang giduso sa diocesan focal person alang sa ministriya sa Voluntary Submission for Reformation (VSR), Fr. Edilberto “Loloy” R. Mahinay, atol sa provincial launching niadtong Enero 17, 2017, sa Lanes Kitaanan, siyudad sa Mati.

Gipahayag ni Fr. Loloy nga ang simbahan mao ang haligi sa kamatuoran ug ang maayong sumbanan sa kaayuhan, ug nga kung ang gobyerno naglantaw alang sa maayong pamalakad, ang simbahan usab nagtumong sa susamang antas sa kaayuhan.

Gipasabot pa sa pari nga ang simbahan makiglambigit tungod kay hugot nga ginaduso niini ang pagtahud sa dignidad ug mga katungod sa katawhan, sama sa dakung tinguha usab sa gobyerno; ug sa mao nga mga katuyu-an dili maka-ako ang simbahan nga magpakahilom.

Dugang gipasidaan ni Fr. Loloy nga sa maong mga pagpaningkamot, adunay mahitabo nga mga babag, nga mao ang mga butang, tinguha, ug mga tawo nga buot modaut sa kaayuhan sa tawo ug sa kamatuoran.

Ug tungod niini, matud pa, ang MASA-MASID mao ang tukmang lakang sa pagpakigbatok sa nahisgutang mga babag; ug sa pagbuhat sa ingon, gikinahanglan usab ang grasya sa Diyos.

Sa launching, gibutyag ni Governor Nelson L. Dayanghirang ang iyang hugot nga pagtamod sa ‘mandato’ sa nasudnong panggamhanan sa aksyon kontra korupsyon, ilegal nga droga ug krimen sa barangay. Gihagit usab niya ang tanang mga mayor sa ngalan sa paghimo sa susamang lihok aron masiguro ang kaayohan ug pagpanalipod sa mga lungsuranon, sugod sa barangay level.

Kumbinsido gayud siya, matud pa, nga ang ilegal nga droga maoy nangunang problema. “It is a major problem that drastically affects the society in terms of crime, violence, and disease, among many others,” dugang pa ni Dayanghirang.

Ang MASA-MASID gipangunahan sa DILG- DavOr Prov’l Office, pinaagi ni Prov’l Director Yvette Tolentino-Sunga, ug gisaksihan mismo nila DILG Reg’l Director Ananias Villacorta, Gov. Dayanghirang, sa tanang mga alkalde ug bise-alkalde sa probinsiya, mga sakop sa kapulisan sa pagpanguna ni Prov’l Director Harry Espela, sa relihiyosong sector, mga DSWD officers, mga sakop sa Liga ng Barangay, ug mga volunteers.

Ang MASA-MASID nahisakop usab sa programa sa Ugnayan ng Barangay at Simbahan (UBAS) nga uban sa relihiyosong sektor, nagtinguha sa paghulma sa kultura sa maayong pamalakad.