Prusisyon sa Birhen sa Fatima gidagsa

Libuan ka mga deboto ug mga parokyano sa parokya sa San Jose sa Sta. Cruz ang miapil sa prosisyon atol sa pagbisita sa imahe sa Mahal nga Birhen sa Fatima niadtong Pebrero 8.

Gisugdan ang prusisyon didto sa Sta. Cruz Transport Terminal paingon sa Munisipyo ngadto sa Simbahan diin gatusan ka parokyano ang nagpaabot. Misugat sa imahe sa pagtuyok ang mga estudyante sa Sta. Cruz Central Elementary School, St. Mary’s Academy, ug Sta. Cruz National High School dala ilang banderitas nga puti ug asul na nagsimbolo sa colors ni Mama Mary.

Anaa usab ang gustong makita ang imahe, ug mga trabahante sa munisipyo na adunay dalang rosaryohan ug kandila. Ang mayor sa lungsod nagpaabot sab sa pag-agi sa imahe. Mga “party poppers” ang gisabwag ug pulong nga “Viva Maria, Viva Jesus!” ang nadunggan sa dalan nga midugang sa kasadya.

Mabulukon ang gipatigayon nga kalihukan gikan sa pagtagbo kaniya, ngadto sa prusisyon ug sa pagpahimutang kaniya sa altar sa Parokya. Tataw nga ang mga parokyano ni San Jose ug ang lungsod sa Sta. Cruz nagkahiusa sa pagtuo ug pagtahod kang Maria. (Mark Anthony Flores Lonzaga | SJP SocCom)