“Pagrosaryo kamo matag adlaw”

Kini ang usa sa gibalikbalik nga gipangayo sa Birhen sa Fatima ngadto sa mga bata nga si Lucia, Francisco ug Jacinta. Sa unom ka bises nga nagpakita ang Birhen Maria sa matag 13 sa bulan sa Mayo hangtud Oktobre 1917, mao kini ang kanunay nga giingon niya sa mga bata.

Nagmasinugtanon ang mga bata sa Mahal nga Birhen Maria. Bisan sa prisohan nagpadayon sila hangtud nga ang mga kaubang piniriso miduyog sa ilang pagrosaryo. Sa ika 13 sa Oktobre 1917, nagpaila ang Mahal nga Birhen, “ako ang Birhen sa Sto. Rosaryo.”

Nganong pagrosaryo man? Diha nga gipangutana si Sr. Lucia ngano man nga pagrosaryo ang gipangayo sa Birhen, ang Birheng Maria mismo ang mihatag sa tubag. Ang pagrosaryo maoy pinakasayon nga pagampo nga mahimo sugod sa pinakagamay hangtud sa pinakadako. Dili kinahanglan ang dakong edad o edukasyon aron magrosaryo. Ang gamay nga bata mahimo nga magrosaryo. Ang masakiton ug mga tigulang na mahimo usab nga magrosaryo. Dali ra kini tun-an.

Dili kinahanglan ang Pari o Obispo alang niini. Dili kinahanglan ang spesyal nga pagtugot sa simbahan aron himoon kini. Dili kinahanglan moadto sa simbahan o kapilya o sangtuario aron magrosaryo. Bisan asa, bisan kanus-a mahimo ang pagrosaryo.

Unsa man diay ang katuyuan sa Mahal nga Birhen bahin sa pagrosaryo?

Wala siya’y laing katuyuan nga gihatag mao nga magrosaryo “alang sa kalinaw sa tibuok kalibutan ug aron mohunong na ang giyera.” Ang maong pagrosaryo matag adlaw nga gipangayo sa Birheng Maria gipaunahan niya’g hangyo sa mga bata sa pagpenitensya ug paghalad niini alang sa paghupay sa iyang Putling Kasingkasing ug sa Kasingkasing ni Jesus nga hilabihan gisakit tungod sa mga sala sa mga tawo – ang sala nga maoy ugat sukaranan sa kasamok ug kagubot sa kalibutan ug sa mga giyera.

Si San Juan Pablo II nga misulat bahin sa Santo Rosaryo sa Birheng Maria, mipahinundum sa tanan nga bisan og Marianhon nga pagampo ang pagrosaryo, apan sa tinuod pagampo kini, UBAN ni Maria, ngadto sa Ginoo. Ang tanang mga misteryo sa rosaryo nagpahayag sa misteryo sa kaluwasan nga gituman ni Kristo alang sa kalibutan. Sa ato pa, nahisentro sa atong Ginoong Hesukristo ang pagrosaryo. Gani, mipadayon og ingon si San Juan Pablo II, nga ang pagrosaryo mahimo nga usa ka pagsumada sa Ebanghelyo ni Kristo. Ang pagrosaryo “tulunghaan ni Maria,” diin ang mga sumusunod ni Kristo mapahiduol kang Kristo pinaagi, uban, ug diha sa Tigpataliwala sa tanang grasya, sa Inahan sa kanunayng Panabang sa Inahan sa kalooy, ang Mahal nga Birheng Maria. Pinaagi sa makanunayong pagrosaryo, maumol ang sumusunod sa tinuod nga pag-ampo, ug makadawat sa daghang grasya pinaagi sa mga kamot sa Inahan sa Manunubos.

Ang sentenaryo sa Fatima karong tuiga, makapukaw unta kanatong tanan sa pagtuman sa gipangayo sa Birhen sa Fatima – “PAGROSARYO KAMO MATAG ADLAW” alang sa Kalinaw sa kalibutan ug pagtapos sa giyera.

Rayna sa Kalinaw, igampo mo kami.