Kumpisal, misa, dihug sa World Day of the Sick

Gipangandaman na karon sa San Miguel Parish sa Panacan ang pagsaulog sa World Day of the Sick karong Pebrero 11, 2017. Base sa miaging mga tuig, dili gayud moubos sa 200 ka mga parokyano nga adunay nagkalain-laing mga balatian ang naga apil sa maong kalihukan aron pagdawat sa sakramento sa kumpisal, pagkalawat ug pagdihug. Ang mga Pangulo sa Alagad (PSA) sa matag GKK maoy nangulo sa pagkalap ug mga masakiton sa ilang katilingban.

Alas 8 sa buntag pagasugdan ang pagpakumpisal. Matud ni Fr. Jun Gimeno, ang kura paroko sa San Miguel, mag imbita ug dugang mga pari gikan sa mga silingan nga parokya ug chaplains aron motabang kaniya sa pagpakumpisal sa mga masakiton. Alas 10 sa buntag ang Santos nga Misa. Pagkahuman adunay simpleng salo-salo nga pagahimuon. Ang mga PSA uban ang mga CWL maoy mag-andam sa mga pagkaon sama sa lugaw, itlog, ug ilimnon. Gilauman nga mahimong malampuson kining maong kalihukan agi ug paghatag ug espesyal nga pagtagad sa atong mga kaigsoonan nga masakiton. (Eleanor Pascua | SMP Panacan)