Kasalan sa parokya, barangay sa Valentine’s Day

Si Lynlyn ug Jhong Magno Alcoseba Jr. duhay na ang anak. Sila mapasalamaton kay natuman na ang ilang pangandoy nga makasal sila ug libre ug makadawat sa Sakramento sa kaminyoon.

Sila usa lamang sa 75 ka paresang bisaya ug lumad nga gikasal niadtong Pebrero 14, Valentine’s Day sa San Roque, Parish ug sa Barangay Covered Court sa Malabog.

Gikasal ni Fr. Jemasol Ortiz ang 48 ka parisan nga bisaya sa San Roque Parish, Malabog. Sa iyang wali, ang kasaulogan tubag sa panawagan sa nag ipon-ipon nga makasal na. Ug aron matuman ang gisaad atubangan sa Dios nga maghigugmaay,magtinabangay, mag atiman sa mga anak, ug mutuman sa mga obligasyon isip magtiayon aron molambo. Nagpasalamat s’ya sa miyembro sa Family Life Apostolate, lay minister, GSL, barangay council, Alma Novo sa pag-process sa mga papeles ug kang Mayor Sara Duterte tungod kay nagmalampuson ang kasalan ng parokya.

Human ang paniudto, gikasal ni Datu Mamboo ang 26 ka mga batan-on na mga lumad inubanan ni Brgy. Captain Jessie Areja. “Usa kini sa programa namo aron matagaan ug pangalan ang mga bata kay kini gamit kaayo labi na sa eskwelahan, sa mga requirements, ug matabangan ang nag ipon-ipon nga libre makasal. Mensahe niya sa mga gipangkasal labi na sa mga lumad nga maningkamot, magtinabangay, ug walaon katong kinaiya nga kinsay daghan grasya tapokan kay makaluya kini sa pagpaningkamot isip magtiayon.

Si Chrispen ug ang iyang asawa nga si Analisa, taga sitio Banzil, misumpa na dili gayud sila magbulag ug kamatayon lamang ang magbulag kanila. “Unta magpadayon gihapon ni nga programa labi na dinhi kay lisod magbaba sa downton aron mag-process sa among papeles.”

Ikalima na kining higayon nga gisaulog sukad tuig 2011. (Imelda Overiz | SRP Malabog)