Inter Mirifica sa Sta. Ana Shrine Parish

Nagtapok ang mga GKK servant leaders niadtong miaging bulan sa Sta. Ana Shrine Parish. Unod sa ilang panagtigum ang panaghisgot – hisgot sa mga aktibidades sama sa umaabot nga pagbisita sa Pilipinas sa Our Lady of Fatima, ang ilang pagpangandam sa umaabot nila nga pista karong Hulyo ug uban pa.

Pinaagi kang Reynaldo Secuya, PSK Coordinator sa maong parokya, natagaan ug higayon ang Archdiocesan Commission on Social Communications aron magpaambit kanila kon unsa ang buluhaton ug misyon niini alang sa katawhan sa Dios.

Samtang naminaw ang mga lideres sa mga pagpaambit, ilang nasabtan nga dako kaayo ang tabang sa pag-abli pagbalik sa DXGN Spirit FM tungod kay mao kini ang atong “mga himan isip mga Kristiyano sa pagpakaylap sa Maayong Balita” kauban ang mantalaan nga Davao Catholic Herald newspaper batok sa nagkaguliyang ug dili maayong mga pamaagi karun sa media aron lamang makakuha ug tigpaminaw ug mambabasa.

Isip positibong aksyon sa maong tawag, ang GLS nakamugna ug mga lakang: Una, isip indibidwal paningkamutan nila nga maka-donate maskin ginagmay pinaagi sa “.25 Alang sa Radyo ko” project; ila pod kining ituyok ngadto sa ilang komunidad aron mahibal-an kini sa ilang mga silingan; ang pagpalit sa atong senimanang mantalaan; pagpaminaw sa DXGN Spirit FM; ug pagpahibalo sa katilingban nga nangabli na pagbalik ang atong Katolikong radio.

Usa ka Pangulo sa Liturhiya (PSL) nga si Alan Elivera midunol dayon sa iyahang P 200.00 alang sa iyang kinasing-kasing nga suporta. Si Msgr. Matt Gorgonio ang Kura Paroko nakig uban usab sa mga lideres isip pagpakita’g dakong suporta ngadto kanila ug sa Katolikong radyo ug mantalaan.

Nagsugod ang “Ronda Parokya” project sa DXGN ug DC Herald Enero sa miaging tuig. Kini aron daghan pang lideres sa GKK ang makahibalo sa “Inter Mirifica”, ang dokumento sa Vatican II kabahin sa midya sa Simbahan. (Jane Imas | SSP SoCCom)