Inter Mirifica sa San Francisco De Asis, Tagakpan

Nagpahigayon sa ilang monthly general assembly ang parokya sa San Francisco de Asis gahapon, Pebrero 5. Ang maong assembliya gitambongan sa tanang GKK servant leaders ug mga aktibong miyembro sa managlahing ministriya.

Tumong sa asembliya ang paghisgot sa epektibong pagpakaylap sa inpormasyon sa tanang katawhan isip pagsangyaw sa misyon ni Kristo pinaagi sa katilingbanong komunikasyon gamit ang media of social communications.

Ang grupo sa Commission on Social Communications sa Arkidayosis sa Davao nga gipangulohan ni Rev. Fr. Ritsche Gamaya mao ang nahimong speakers sa general assembly.

Sila nagpalawom o nag-abli sa kahibalo sa mga parokyano nga ang katungdanan sa pagsangyaw sa misyon ni Kristo dili lamang responsibilidad sa mga obispo o kaparian apan responsibilidad usab kini sa tanang sumusunod ni Kristo.

Matod pa ni Fr. Ritsche Gamaya, “dili tanang inpormasyon nga atong makutlo makatabang sa atong pagtoong Katoliko. Nan ang atong gugma sa atong isigkaingon mao makapalig-on sa atong pundasyon isip sumusunod ni Kristo.”

Gidugang usab ni Fr. Ritsche nga ang media usa lamang ka pamaagi aron mapakaylap ang kamaayo sa Ginoo ngadto sa tanang katawhan. Nahuman ang general assembly nga adunay nakutlo nga kahibalo ug bag-ong realisasyon ang mga parokyano sa San Francisco de Asis Parish -Tagakpan. (Jeffren Miguel | SFDA SoCCom)