Dula sa kababaihan sa basketball, gikalingawan

Malampuson nga gisaulog sa mga miyembro sa Birhen sa Lourdes GKK-Maligatong, Baguio District, Davao City ang ika-68 niini nga kapistahan niadtong Pebrero 14.

Gisugdan ang selebrasyon pinaagi sa usa ka Santos nga Misa nga gipangulohan ni Fr. Ricky T. Flores. Gitambungan kini sa mga pangulo ug miyembro sa GKK. Matud pa ni Father Ricky sa iyang homiliya nga ang pagkamasinugtanon ni Birhen Maria sa kabubut-on sa Dios, nagpasabot nga gihigugma kita niya; nga ang mensahe ni Birhen Maria magrosaryo kanunay.

Ang Maligatong Youth Catholic Association sa panguna ni Erf Louie Cañamo, ang Pangulo sa Batan-on maoy nag organisa sa aktibidad sama sa Volleyball.

“Hago apan nagbunga man sad kay makalingaw ug nindot ang nahimong resulta. Labaw sa tanan nalipay ang katilingban,” matud pa ni Cañamo.

Nakuha sa Durian Village team ang 1st prize ug sa Maligatong Selection team ang 2nd sa Volleyball (Boys). Sa Volleyball (Girls), nakuha sa Chocolokay ang 1st prize, samtang ang 500 IB team sa 2nd prize, ug ang Maligatong Selection team sa 3rd prize.

Sa Basketball (Boys) nga gidula sa batan-on nga nag-edad ug 18 anyos paubos, ang SDG Baguio ang nakakuha sa 1st prize, ang BPP Masanba sa 2nd prize, ug ang Nathans Elite sa 3rd prize.

Nakapadugang sa kalingaw sa katilingban ang pagsayaw sa “Mix Dynamics Crew” apan, mas nalingaw ang mga tawo sa pagdula sa mga babaye sa basketball. Gidula kini sa 500 IB batok sa Jolinan. Napuno og kinatawa ang tanang nanan-aw lakip na ang referees tungod sa makalingaw nga dinulaan ug paningkamot sa mga babayeng koponan. Gideklarang daug ang 500 IB.

Matud ni Consorcia Torres, ang Pangulo sa Alagad (PSA) nga mapasalamaton siya sa Makagagahum nga Diyos ug sa GKK Servant Leaders kay nagmalampuson ang kapistahan sa GKK.

Nahuman ang maong programa pinaagi sa pag-anunsiyo sa mga mananaug sa nagkalain-laing kategorya. Ang GKK sakop sa San Pedro Calungsod Quasi Parish, Baguio District. (Jesyl Caminero | SPQP SoCCom)