Demo farm sa lumad gitamnan sa IPA scholars

HUMAN ma turn-over sa mga madre sa Hijas de Jesus ang luna sa IPA diha sa Malabog, nagtanum ang mga scholars ug Mahogany aron makatabang sa kinaiyahan. (June Guadalquiver)

Ang Indigenous Peoples Apostolate sa Archdiocese sa Davao, pinaagi sa suporta sa Episcopal Commission on Indigenous Peoples sa Catholics Bishops’ Conference of the Philippines malampusong nakapahigayon ug tree planting niadtong miaging bulan sa Sitio Pamantawan, Malabog, Paquibato District.

Gisalmotan kini sa mga IPA scholars isip ilang proyekto alang sa kinaiyahan, kauban ang mga maestra sa Pamantawan Elementary School, IPA ug mga ginikanan luyo sa nagdaut nga panahon ug kalisod sa dalan nga agian padulong sa site. Gipananum ang mga semilya sa kahoy nga Mahogany sa luna nga himoong IPA Demo Farm nga paga-ugmaron sa mga sakop sa Malabog Tribal Farmers Association nga gilangkoban sa mga ginikanan sa IPA Scholars.

MULOY

Ang IPA Model Farm gilauman nga pinaagi niini makab-ot ang mga tinguha nga gisimbolo sa acronym nga MULOY nga nagkahulogan ug “Malangkubong pag-Ugmad sa katawhang Lumad og Yuta.” Apan una pa niining tree planting, gipahigayon niadtong bulan sa Disyembre sa niaging tuig piaagi sa Santos nga Misa ang pagpabalik-kalagsik sa katilingbang lumad sa maong dapit arun pag-agni kanila sa pagsuporta sa mga proyekto ug programa sa IPA.

Ang Santos nga Misa gipanguluhan ni Fr. Jojo Ortiz, ang kura paroko sa Malabog. Diha sa iyang homiliya iyang mensahe nga “unta anaa kanunay sa panglantaw sa mga lumad nga kab-oton ang mga damgo nga kalampusan ug kalambuan alang sa nagsunod nilang mga kabataan ug mga anak”.

Ang Tree Planting lakip sa Ecological Component sa IPs for PEACE, diin ang tumong niini ang paghatag ug bili, pag-ayo, pag-amuma ug pagpanalipod sa kinaiyahan isip kabahin sa lumadnong kultura -tradisyon ug kinabuhi.

Kini haum usab sa dagan sa kahimtang sa katawhang lumad diha sa ilang mga tagsa-tagsa ka katilingban nga kasagaran anaa malugar sa tunga sa panagbingkil tali sa gobyerno ug ang mga nagasupak sa gobyerno.

PANAWAGAN UG SUPORTAHAN

Si Ronel Baguio ang pangulo sa mga ginikanan sa mga lumad diha sa iyang pagdawat sa maong katungdanan nagpasibaw nga unta suportahan sila sa ilang pagpaningkamot sa pagkab-ot sa kalambuan ug nga panalipdan sila arun makapadayon sa pagkinabuhi nga malinawon ug malipayon.

Mao usab kini ang usa sa mga tumong sa IPA sa paglusad sa programa, nga mahigmata ang tanan; nga isipon kini silang mga kaigsoonang lumad nga kabahin sa kinabuhi tungod kay duna silay dakung ikatampo sa abot sa uma sama sa mga utanon nga atong makaon diha sa talad kan-anan, ug pinaagi sa pag-usbaw sa abot ug pagbaligya niini makalingkawas usab sila sa kapobrehon.

Ang luna nga gigahim nga katamnan gibana-bana nga dili muubos ug kapin sa upat ka ektarya. Kining lunaa gipasa sa IPA gikan sa mga madre sa Hijas de Hesus nga maoy nagbayad sa luna arun katamnan ug kapahimuslan alang sa programa sa agrikultura ug ekonomiya sa lumad. Mil kinyentos (1, 500) ka semilya sa kahoy ang gipunting nga gidaghanon nga matanum sa maong luna palibot sa mga utlanan niini.

Ang IPA mapasalamaton ug daku sa naghatag sa mga semilya gikan ni Mam Joy Gegare nga taga Mintal nga sakop sa Rosary of our Lord nga pundok. Apil usab nga gipasalamatan ang mga nihatag ug financial support gikan sa Kauban sa Lumad ug sa mga kahigalaan ni Fr. Jun Acedo. Sa sunod higayon sa pagpananum giplanuhan nga pagahimoon sa Marso ning tuiga. Giawhag ang tanan nga unta musopurta sa pinansyal man, pagkaon ug sakyanan, alang sa mga lumad nga nanlimbasog sa pag-amping sa kinabuhi ug sa kinaiyahan. (June Guadalquiver | IPA-Volunteer)